WHO staff Myo Min Htut an kap that thu ah UN le WHO Annkaa

June 8, zaanlam nazi 5 hrawng ih kahthatmi WHO staff Myo Min Htut thih thu ah UN in a kap thattu a dem ih thufelfai zirzoi dingin le mithattu in a tuah mi par ah mawhphurhnak la dingin dilngennak thu an suah.

UN hnuai ih um World Health Organization Director-General Tedros Adhanom Ghebreyesus khalin siat tongtu sungkhat unau rualin an tuarpi ve thu, WHO aiawh in a rel ih “hivek cangvaihnak cu kan dem. Felfaiten zirzoinak tuah ding in le sual tuahtu in mawhphurnak la dingin kan beisei” tiah a ti.

Myo Min Htut cu Kawlram WHO zung hrang kum 5 lenglo mawṭaw mawng zotu a si ih, June 8 ah Mon ramkulh, Mawlamyine khawsung ah mawṭaw cycle a to lai ah an kap that.

Kah that a si zaan ah People’s Defense Organization – Mawlamyine in an mah cangvaihnak a si thu, official in an phuang.

FB ihsin an hlon hlo zo mi People’s Defense Organization – Mawlamyine thusuah ahcun Myo Min Htut hi ralhraangbawi Lt. Gen. Aung Lin Dway sungkhat naivai a si ti`n an tarlang.

Cuhleiah CDM tuahtu le an sungkhat naivai pawl hringhro in, mi inn luhcilhnak tivek ah ralhraang ralkap a hoha ruangah kan kap that mi a si ti`n tarlang a si ih, PDOM cun voi 5 kan kap ih a thi ti`n thu an suah a si.

Leave a Reply

Your email address will not be published. Required fields are marked *