Min Aung Hlaing in a ralkap pawl tlansuak theilo dingin Hrenkhihnak a tuah

SAC ralhraang in April 1 ihsin thok, ramsung khualtlawng sukso nakah hmatpungtin ken tengteng dingin thu a suah rualin a ralkap pawl tlansuak thei lo dingin ziinkong phunphun a hawl.

Athupten NUG pehtlaihin ralkaptlan an tam thlang ruangah tlansuak thei lo dingin ziinkong phunphun an hawl ih, kan dungbai, ralkap CDM tuahtu ṭhenkhat Australia ram an thleng thu, thuthang a suak khalah thuthang diklo a si ti`n an mah ralkap sungah thu diklo an theh darh.

Cuvek boruak a rak um cia hlei ah SAC ralhraang in a ralkap pawl olaiten lengsuak theilo dingin an hmatpungtin pawl mahle umnak tatyin ralbawi hnen ah an apter tiah theih a si.

“Innsang neizo ralkap sungkua pawl cu lenglam suak sian an si lo tikah CDM tuah ding an harsa. Tleirawl mino deuh ralkap pawl cu ziinkong phunphun hawlin an tlansuak tikah, a neetnak ahcu an hmatpungtin pawl an lak sak.”

“Atucu leng suak siannak an ngah khalle hmatpungtin umlocun khual an tlawng thei nawn lo ding. Tat sungih um mino pawl ih hmatpungtin zaten an lak sak zo. Tlansuak thei hlah hai seh ti`n an thluak an hmang” tiah Ralhraang sunglam thu pholangtu “Hram” pakhat relmi cu KTM in a tarlang.

“Hram” dang pakhat khalin “rampi hrilawknak hrang ti`n tat sungih innsang mipum um zat, hmin cazin tivek pawl cu cipciar in an la thok rero” tiah a ti.

Leave a Reply

Your email address will not be published. Required fields are marked *