US ram um Ralhraang lamṭang Kawlrammi pawl Mual Phoh tum

Ralhraang ralkap in rampi ṭheuhsuahin ramsung mipi duhtawk ih a soisa lai ah US ram, khua dangdang ih um Kawlram mi ṭhenkhat cu pursum tuahpi nakin siseh, bulpak in maw, ralhraang ralkap thawn pawhawtu an um.

Cu pawl cu tuhlan ihsin ralrinpek an rak si nan, ralrin peknak ziang siar tham loin an um hlei ah luarkai tukin an cangvai ruangah US hrambun pawlkom 4 pawl in netabik ralrin peknak thu an suah ih, mah keel ten a um thotho pawl cu an hmin, an umnak le ralhraang thawn pehparnak pawl pholang in mual phoh an tum.

Abikin Washington D.C, Maryland le Virginia ih um Kawlram mi an bat ih, “netabik ralrinpeknak ziang siar loin an um pang cun Daan thawn milaw, hmual nei mualphohnak kan tuah ding” ti`n thusuahmi ah an tarlang.

Ramleng ih um pawlkom sung thu theitu mipakhat khalin “Direct lole a kawi zawngin ralhraang ralkap thawn naivaitu an si ih an mah ruangah buainak khal a suak rero zo.”

“Ramsung mipi harsatnak petu ti thei cingin an hlawk nak liolio ah ralhraang thawn pursum tuahtlang an um ih cupawl cu ralrinpek an si zo. Ralrinpeknak ziang siar lo tu cu Daan thawn milawmi hmual nei social punishment pek an si ding” tiah a ti.

Mualphoh awknak cu Washington D.C ihsin ṭan thok tum a si ih, US ram lawng si lo, Canada, Australia le Dubai telin leitlun ram dangdang ih um Kawlrammi pawl khalin hih cangvaihnak hi hman vivo ding an beisei a si.

Ramdangum Ralhraang lamṭang Kawlrammi ralrin peknak thusuah cu Anti Dictatorship in Burma-DC Metro Area, အလင်းရောင်လူငယ်များ – Light Of Youth Myanmar, Chin Community of USA, Inc – D.C Area, ဓမ္မဘက်တော်သား ပြည်သူများအဖွဲ့ tipawl suahkhawmmi a si.

Leave a Reply

Your email address will not be published. Required fields are marked *