US President hlun George W Bush amahten a mual phoh aw

US President hlun George W Bush in Russia cozah a dem lai ah tum hran loin tuhlan kum 15 luan zo ih thil cang a rel pang ih leitlun mipi cun sual a tuah mi a phuangaw ti`n an pom.

Tlawngkai nithum ah Us, Texas, Dallas mipi hmai ah dingin Russia elections tuah dan a dik lo thu a rel ih “Cozah hruaitu ah tling theilo dingin an zuampi ṭhenkhat cu daan loin thawng an thlak. Miṭhenkhat an that” tiah George W Bush cun a rel ih, cumi ihsin Putin ih Ukraine luhcilhnak a cang suak vivo ti`n rel a tum. Nan, Ukraine tiding cu Iraq ti`n a rel ngah pang.

“Mipakhat thuthluknak men a simi, awmanglo, rapthlakza Iraq luhcilhnak” ti`n George W Bush cun a rel pang ih phuhrungaw nawn in “Ukraine ka ti duh nak” ti`n hni phah in a sim sal. Cuhnu ah “Iraq khal a si thotho” a ti. A sim duh san cu Iraq luhcilh dingih thu a rak suah mi kha thil awmanglo a si ti`n a rel duh mi a si.

Bush thurellai video tawi cu online ah a laar zetih a zohtu mipum million teel an um. A share sawngtu tarlangmi le like hmutambik comment pawl ih ngan tambik cu “US ram hi ziangruangah sual an tuah khal le hrem an tuar ve dah lo. Ziangruangah hremawknak a um ve dah lo” ti hi a si.

Bush president ṭuan lai, March 2003 ah amah thupeknak thawn US ralkap in Iraq ram an luhcilh.

Iraq lal Saddam Hussein cozah in mitampi thattheinak ralthuamtum a nei thei ti`n Iraq ram an luhcilh ih buainak nasatuk a suak. An hawlmi ralthuamtum cu tuni tiang khihhmuhding a um lo.

Iraq buainak thawn pehparmi ah US cozah in $800 billion lenglo a cemliam ih a rammi ralkap le cozah hnaṭuan mipum 4000 luan in an nunnak an liam phah. US ralkap in Iraq an suahsan cu kum 2011 ah a si ih kum 9 sungah Iraq rammi ting 1 luan an thi.

An ram buainak a rak um cia mi thawn US ralkap luhcilhnak hin buainak a sosangter sin ih, ramsung siatralnak le mipi tuar natnak pawl thlir salin Iraq ram a keel a awh sal thei pei maw ti cu an tefasin san lam lawngah theih cian a si leh ding.

Leave a Reply

Your email address will not be published. Required fields are marked *