US cozah in SAC ralhraang a mual phoh

Rakhine ram ih um Rohingya Muslim pawl buaihnawh thu thawn pehpar in UN thuṭhengzungpi ah SAC ralhraang an khing lai fangah, cuih thu thawn pehpar thotho in, US cozah in Myanmar ralkap cu phunhnam ciimit tumtu ti`n leitlun mipi theih ah a phuang.

US Secretary of state Antony Blinken in Holocaust Memorial Museum ah thuthannak a nei ih “US ram hin phunhnam/biaknak zawngih mihring ciimit tumnak voi 7 a um ti`n kan pom ih, tuni in voi 8 a um ti`n kan hminsin. Burmese ralkap pawl in miphun ciimit tum in mihring zate par ah sual an tuah rori ti`n kan pom” tiah a ti.

US cozah palai cun “Myanmar” timi ṭongfang aiah kum 1989 hlan ih Kawlram hmin a simi “Burma” timi ṭongfang a hmang hrim. Cumi ṭongfang cun Tlangparmi nuaineek an tuar cuang mi a khihhmuh tiah thuruat thiam pawl in an zum.

Antony Blinken cun Kawl ralkap pawl in Rohingya an hrutfai tum dan le tuhlan ih thil thleng pawl a khaikhin phah ih “ciamciam khuakhannak thawn Rohingya an do” a ti.

US cozah hin Kawl ralkap sual a puh hlan ah Bangladesh ih um Rohingya raltlan 1000 lenglo thusutnak an nei hmasa.

Mipum 1000 sungih zaṭek 75% hrawng cun bulpak rori`n Kawl ralkap sungtel pawl in mi an that lai kan hmu an ti.

“A hrek hnakih mitamsawn cun nupa sualnak thawn pehparmi suamawknak an tuah lai kan hmu tiah an sim. 5 sungih mipakhat in a burbur in mithat lole mi an hrem lai kan hmu an ti – Voilekhat ah mipum 100 hnakih mallo an that lole hriam an pu ter” tiah US cozah ṭuanvonei Antony Blinken cun a rel.

Kawl ralkap pawl in 2016 ihsin thok, Rakhine ram ih sual an tuah mi thawn pehpar in US cozah in hremnak a rak tuah tam zo ruangah tuṭum sualpuhnak thulu hnuai ah a hranten hremnak an tuah tum lo nan, UN thuṭhenzung ih Kawl ralkap khingtu pawl cu $1 million ṭanpinak an pe tum hlei ah a thu zawngin a ṭuldan ih zirin ṭanpinak an pe tum tiah theih a si.

US cozah in Kawl ralkap sual a puh mi cu UN thuṭhenzung ih an khing nakah siseh, Australia ih thubuai an tuah sak tum mi le Kawl ralkap bawmtu ram pawl dawn kham awk nakah a ṭangkai ding an zum a si.

Leave a Reply

Your email address will not be published. Required fields are marked *