US ah Chin mino kum 18 mi an kap that

Chin khawlipi tiih kohmi US ram, Indianapolis ah Chin mino kum 18 mi an kap that tiah theih a si.

Kan dung tlawngkai nikhat zaanlam nazi 2 le minute 45 hrawngah Madison Avenue le County Line ziinpi kiang 8800 block, St. Peter ziin lam ihsin palik pawl in meithal kahawknak a um thu phone call an dong.

A hmun an va thleng cu mipakhat meithal hriamtuar besia zet a rak um ih Methodist Siizung ah an tlanpi nan a nunnak a cem tiah cbs4indy thuthang in a tarlang.

An kap that mi cu Chin mino kum 18 mi Ngun Tha Peng a si ti`n Marion County Coroner Office in thu a suah.

Kahawknak thuhla cu palik in cipciar in an phuang lo ih, buainak thawn pehparmi thu theitu cun Marion County Coroner Office phone lole Lottie.Patrick@indy.gov email ah pehtlai dingin thu an than.

Cun, hmin lang loin kahawknak thuhla relduhtu cu Crime Stoppers of Central Indiana phone number 317-262-TIPS ah pehtlaihnak nei ding in thu an than cih.

Salai Ngun Tha Peng thih thu ah US ram um Chinmi į¹­henkhat cun mah le mah an kapaw ti`n an rel nan palik in nemhngetnak zianghman an nei hrih lo.

Kan dung March thlacem lam khalah Indianapolis ah Chin mino 2 meithal thawn an rak kap that dah zo.

Mithi cu Thawng Ceu (kum 21) le Boi Nge (kum 18) te pahnih an si ih kah that an si thu ah palik in thuhla felfai zirzoinak an nei rerolai tiah theih a si.

Leave a Reply

Your email address will not be published. Required fields are marked *