Ukraine dinhmun ṭum suk lam a pan, Peng 40 sau Raldo mawṭaw le Tank pawl in Kyiv khawpi an neih vivo

Ukraine le Russia buainak cu kaphnih hruaitu pawl biakawknak an nei zo nan daih lam a pan thei hrih lo hlei ah Belarus rampi in Russia ralkap a bawm thok.

“Russia hin an kut ih kan apaw hlan lo hmai in nor tum ti`n ka hmu” tiah Ukraine President Volodymyr Zelenskyy in tlawngkai nikhat zaan ah a rel.

Tlawngkai nikhat sun ah kaphnih hruaitu pawl caantawkmawi thurel tlangnak an nei nan, Ukraine President Volodymyr Zelenskyy cun cuih thu cu cipciar in a rel tel lo ih “Kyiv khawpi cu dung a siip tum hrih lo” tiah a ti. President thureldan le thureltlan hnu kahdonak a um pehzom dan in Belarus border ih kahhnih hruaitu thureltlangmi cu a tluang lo a si tiah mithiam pawl in an rel.

Culaiah, Ukraine North Territorial Defense Forces ṭuanvonei Vitaliy Kyrylov cun Ukraine nisuahnak saklam ih um Chernihiv khawpi ah Russia ralkap bawm dingin Belarus ralkap pawl an thleng zo a ti.

Belarus rampi hruaitu Dictator Alexander Lukashenko khalin kan ram humvennak hrangah a ṭul dan ih zirin kan border ah ralkap pawl kan kuat leuhleuh ding a ti. Ukraine ramsung doawknak ah Russia lam ṭangin Belarus ralkap pawl an cangvai rero zomi cu rampi hruaitu in a rel tel lo.

Tu dinhmun ah peng 40 sau Russia le Belarus ralkap ta raldo mawṭaw, Teng tivek… cun Ukraine khawpi an neih vivo ti a si ih, Bashar al-Assad’s forces thawn ṭangrualin Russia in Syria an rak nuai ṭum vekin Kyiv khawpi an la tum siding tiah mithiam pawl in an ruat ih, rocket le ralthuam dangdang thawn khawpi an bat thok mi khal hin Russia zawh mi lamzin a ti lang zo tiah an rel.

UK hrang ih Ukraine palai Vadym Prystaiko khalin an ram mipi hrang a thinphang thu a rel ih “khaw tamsawn ih ei-in dawr ruak hmuh ding a tam zo. Russia hin kan ei-in supply pawl in chat sak thluh thei. Cumicu ruat ṭhat a ṭul ih ralkap hruaitu pawl in mipi hrang ei-in sambaulo dingin hmalaknak an nei lohli ṭul” a ti.

Maxar Technologies in satellite zuk a suah mivek a si le mipum 3 million hrawng umnak Kyiv khawpi thawn peng 17 hrawng hlatnak ah peng 40 sua Russia raldo mawṭaw, Tank le ralthuam phunphun a thleng zo ti a si.

Leave a Reply

Your email address will not be published. Required fields are marked *