Taliban Ralhraang pawl in Nunau zung hnaṭuan pawl an dawi tlung thluh

Taliban ralhraang pawl in asangsang ten Afghan ram an la vivo hnu ah hmun ṭhenkhat ih nunau zung hnaṭuan pawl cu hna ban san dingin le hnaṭuan nakah feh nawn lo dingin ralrin an pe.

Bank ṭhenkhat ah meithal thawn an lut ih zung hnaṭuan nunau pawl an tlun ter. An aiawh ah sungkhat naivai mipa hnaṭuantuding nan thun lut thei tiah theihternak an nei cih.

“Kum tawkmawi hna kan ṭuan zo ih atu ah hivekih hna ban aw cu amak ka ti zet. Nan, kan mah lam in titheih kan nei lo. A cang mi cu a cang rero si ko.”

“Hnaṭuannak hrang ah keimahten mirang ṭong le computer tham dan ka zir ih teimaknak thawn hnaṭuan ka ngah mi a si. Nan, tuahcun nunau ṭuan theih nak hnadang ka hawl ṭul si ko” tiah Azizi Bank ih hnaṭuan Noor Khatera (kum 43) cun Reuters hnen ah a sim.

Nunnak thaap rorin nunau pianvo hrang an rak sualneh mi cu Taliban ralhraang pawl an lal hnu ah thulolak ah a cang thluh.

May thla hrawngin US ralkap pawl in Afghan ram an suahsan hnu ah Taliban ralhraang pawl cun a sangsang ten hmunram an la vivo ih August 15 ah Afghan khuapi Kabul an luhcilh ih, a tu ah President umnak zung tiang an luah zo a si.

Taliban ralhraang pawl hin kum 1996 ihsin 2001 tiang Afghan ram an rak uk ih, cu lai ah nunau tlawngkai an siang lo. Khualeng vahsuah tikah hmel lang lo dingin nunau pawl puan an khuh ter hlei ah lengsuakvak cun sungkhat naivai mipa pakhatkhat in thlun tengteng ding tiah daan an rak tuah.

Cumicu Islam daan a si tiah an aupi ih biaknak daan tiih an kohmi cuih daan pahbaltu nunau pawl cu hremnak phunphun thawn daantatnak an nei hlei ah miṭhen cu khuatlang mipi hmai rori ah an vuak an vel ih an hrem.

Mipi hriltlinmi cozah an lal lai ah cuvek hremawknak um nawnlo dingin le nunau hnaṭuan, tlawngkai theih dingin Islamic system thawm milawmi daan kan hmang ding tiah Taliban ralhraang pawl cun an rak aupi nan, tikcucaan a thlengaw ih an lal ngaingai tikah nunau pawl cu an hnong thok lala a si.

Tuṭum rampi thuneihnak an la hnu ah ziangvek daan thawn ukhruai an tum timi thu thawn pehpar in Taliban ṭuanvonei Zabihullah Mujahid cun “Islamic system kan hmang hnu ah daan sungih um mi le pathian duhdaan in ke kan kar vivo dingih ramsung buainak zianghman a um lo ding” a ti.

Leave a Reply

Your email address will not be published. Required fields are marked *