Russia-Ukraine thubuai ah Leitlun mipi Bum let thluh tum

Atufang leitlun mipi ngaihvenbikmi Russia-Ukraine thubuai thawn pehpar in Russia hmanfung meidia siseh, bulpak khalin mipi ruahnak vavaiter tumin thuthang diklo nasaten an thlah darh.

Thuthang diklo le phuahcawp/tuahcawp video darh mi lakah mipi ngaiven hlawhzet pakhat cu “mithi vekin lei par ih puan dum khuhmi mitampi hmai ah reporter in thu a phuang laifang” video tawi hi a si.

Video tawi ahcu “Reporter in thu a phuang lai ah a dunglam ih mithi vekih ihmi mipakhat a cang ciamco lai a lang ih mi pakhat in remten puan a va khuh sal laifang” an ti lang.

Mipi bumnak hrang, remṭhat betmi cuih video cu Russia hmanfung verify account pakhat in online ah a thlah darh ih “Mangbangza! Social media ih an thi termi Ukraine rammi mithi a tho saal lai cu live camera hmai ah a lang thluh. An thu tuah cawp cu phelkuai vivo in a lang fiang cak zet” tiah catawi a ngan tel.

Mai duh dan zawng in remṭhat bet mi duhsannei video tawi cu Ṭhalpi ram kaang bangin online ah a kaat cak zet.

Mizo kan unau le Chinmi ṭhenkhat khalin thuhla felfai zirzoi hna thiam loin a tak ah ruattu an rak um ih online ah an theh darh sawng bet.

Thudik

A thlah darh tu tamsawn cu US rampi hrilawk ṭum ih tumtahnei thuthang diklo darhtertu Russia hmanfung palai le lar duh Youtube/FB/Instagram … tivek… internet cahmai pawl an si ih catawi an tar tel mi hmuh ding tambik cu “Lem an cang men mi a si. Ukraine ah ralbuainak a um taktak lo. Leitlun hruaitu pawl in tumtah neiin Lem an cangter men” ti hi a si.

Nan, atak ahcun video thlah darh mi cu Ukraine ram ih zuk mi a rak si lo. Leitlun nikhua boruak thawn pheparmi “climate change protest” duhphorhnak an tuah lai video sawn a rak si.

“Friday for Future” climate activists hohanak thawn Austria khawpi Vienna khua ah minung in nikhua boruak kan sia ter zia langter in February thla ah duhphorhnak an rak nei mi a si.

Himi video hi Pulhnatpi thawn pehparmi thuthang diklo thlah nakah conspiracy groups pawl in an rak hmang dah zo a si.

Austria, Vienna khawpi ih “climate change protest” duhphorhnak an tuah thu Original article …. Schock-Protest: 49 Aktivisten im Leichensack

Leave a Reply

Your email address will not be published. Required fields are marked *