Russia ralkap in US Journalist pakhat an kap that

Ukraine luhcilhtu Russia ralkap in Kyiv khuapi kiangah New York Times hrang hna rak ṭuan dahtu US journalist Brent Renaud an kap that.

Cuih thu cu The Newyork Times in a nemhnget ih, Kyiv pengṭhen palikbawi Andriy Nebitov khalin thutak a si thu, a rel a si.

“Ukraine ram ih thilthleng rapthlak pholang tumtu US journalist cu rampi luhcilhtu Russia ralkap pawl in an kap that.”

“Kan ram thilthleng thu dik pholang tumin US rammi Brent Renaud a nunnak a cem, a hnaṭuanpi mipakhat hrimtuar a um” tiah Andriy Nebitov cun ti.

Media ṭhenkhat cun NYtimes hrang video a zuk lai ah a nunnak a liam tiah an tarlang nan, New York Times deputy managing editor Cliff Levy cun “Ukraine ram ah American journalist Brent Renaud a thi thu, riahsiaza thuthang kan thei. Amah hi mizuk le zuknung tuah thiam zet a si, Nan, tuṭum hi NYtimes hrangah Ukraine ah a feh mi a si lo” tiah a ti.

Ram mi ngaihventhei zettu US cozah hin American journalist Brent Renaud thih thu ah ziangtin an thungrul ding timi cu atufang leitlun mipi ih thlirbikmi thuhlapi pakhat a si.

Leave a Reply

Your email address will not be published. Required fields are marked *