Russia ralkap in an Ralbawi pakhat Tank thawn rial that hrim

Tuhlan zarh 1 hrawng rei zo ih hriam tuar Russia ralbawi Colonel Yuri Medvechek cu a nat tuar loin a nunnak a cem.

Amahhi Ukraine ih raldotu 37th Motor Rifle Brigade commander a si ih a kut thuai ralkap pawl in Tank thawn an rial hrim tiah nitlaknak ram pawl in official in an phuang.

“Raldonak ih an sunralnak thawn pehparin amah thupeknak hnuai ih um ralkap pawl rori in an ralbawi an that. Cumicun Russia ralkap pawl raldonak ih an hmuhtonmi, an tuar mi a ti lang. An nunkhua, an ruahnak tiang a khawng ban.”

“Ziang khal siar tham loin a ralkap pawl in an that hrim tiah kan zum. A ralkap pawl in Tank thawn an rial that ti`n kan zum” tiah Western Official mipakhat relmi cu Dailymail in a tarlang.

Russia in Ukraine ram an luhcilhnak thlakhat fai a kim zo nan thu phunphun ruangah duhvekin an cangvai thei lo hlei ah ralkaptlan khal an tam zo ti a si.

Tuhrih tiang ih thuthang suak mi ah Ukraine luhcilhtu Russia ralkap 15,000 hrawng an thi zo ti a si ih, cumi ah rank sang ralbawi 7 an tel thu, Ukraine media in a tarlang.

Leave a Reply

Your email address will not be published. Required fields are marked *