Russia in Ukraine a luhcilh ding thu kan sim cia nan kan thu an ngai duh lo – Biden
Russia in Ukraine ram a luhcilh hlan ah US cozah in Ukraine President Volodymyr Zelenskyy hnen ah ralrin an pe cia nan thu sim ziang hman a ngai duh lo ti`n US President Joe Biden in a rel.
June 10, Los Angeles ih Ukraine bawmnak petu pawl hnen thu a sim lai ah Biden in a rel mi a si.
“Mitampi in ka sim porh deuh tiah an ruat men ding. Nan, Russia President Vladimir Putin in Ukraine a luhcilh ding mi cu data kan nei mi ah a um thluh. Asinan Ukraine President Volodymyr Zelenskyy in kan thu sim mi a ngai duh lo” tiah Biden cun a ti.
US cozah in January thla cem lam ah ralrin an pe rero zo nan thlaphannak nan suakter ti`n President Zelenskyy in Biden hnen ah a rak sim dah mi cu Ukraine cozah ṭuanvonei mipakhat in CNN hnen ah a rak sim ve dah.
US National Intelligence Director Avril Haines khalin “thuthup tiih ret ṭhat mi tiang pholang in an theithiam theinak dingah Biden in a sim faing hai” ti`n June 6 ah a rak rel dah zo.
Biden said Zelenskyy 'didn't want to hear it' when US intelligence warned Ukraine that Russia would invade https://t.co/X2xQFaskWs
— MSN (@MSN) June 11, 2022
US cozah hin buainak a suak thok ihsin tuini tiang $ billion tamzet man bawmnak a pe zo ih, cumi ah ralthuam siseh, siivai le mipi ṭulpoimawhmi thil phunphun a tel.
Tu dinhmun ah ramdang bawmnak thawn Ukraine cozah in Kyiv le Kharkiv telin an khawpi ṭhenkhat cu a hum thei nan, Russia cozah in atharin a bat sal mi Donbas region lam humkhamin nitinten an kapaw laifang a si.
