Russia cozah in Raldo Helicopter thawn Ukarine ralkap an cilnuai lai zuknung thlah darh

Ka-52 raldo Helicopter thawn Ukarine humhimtu ralkap pawl an kap lai video cu March 18 ah Russian Defence Ministry in online ah a thlah darh.

Putin in Ukarine luhcilh dingin thu a suah ni ah Russia raldo Helicopter 200 lenglo an hmang ti a si ih, atu Russia Helicopter raldo lai video an thlah mi khalah amalbik Helicopter 5 a lang.

Russia raldo Helicopter cangvainak cu Kyiv khawpi kah nak ding hmun remcangzet Hostomel Airport ah a si ih February 24 ih zuk mi a si.

Leipar ih cangvaituding Russia ralkap pawl phurtu MI-8 Helicopter kil phahin an ṭum nak ding lamziin a sial sak.

Tanglam ihsin Helicopter kahnak bomb meithal le meithal pangai thawn Ukarine ralkap pawl in an kap nasa nan a tamsawn cu a hrial thei ih kah ngah nak cu a malte ti`n Russia cozah cun thu an suah.

Russia hin tuhlan khalah Hostomel Airport an lak lai video an thlah zo ih, Ukarine cozah khalin Russia vanzam an kap lai le Tank, raldo mawṭaw tivek an siat sak lai video cu online ah an thlah darh ve. Atakin an doaw hlei ah thinlung ruahnaklam khalin an doaw phah a si.

Siarbet : Russia cozah in Kyiv khuapi kiang, Hostomel Airport an lak lai Video an thlah

Ukraine airport (Hostomel Airport) an lak lai video cu Ministry of Defense of Russia in online ah an thlah darh.

Tanglam ah Video zoh ….

Hostomel airfield cu Antonov airport thawn umkopmi a si ih Ukraine ram, Kyiv khawpi nitlaknak saklam ah a um mi a si.

Kyiv khawpi kah nak ding hmum remcang zet Hostomel airfield cu February 24 ah Russia ralkap in an kap thok ih, Ukraine ralkap thawn nasaten an do aw hnu, February 25 ah Russia cozah in kan lak suak thei tiah an phung.

Doawknak ah Ukraine suanvawr zetmi Leitlun vanzam tumbik Antonov An-225 ‘Mriya’ vanzampi a siat phah.

March 12 ih thlah mi Hostomel airfield an lak lai video sung a lang dan ah Russia ralkap pawl Airport ih an ṭum hlan ah hmun hla ihsin an rak kap hmasa si in a lang. Russia ralkap pawl vanzam thawn an ṭum zikah airport kiangkap cu bomb khu le meikaang khu a khat zo.

A thok ahcu Ukrainian Ministry of Internal Affairs in Hostomel airfield pumhlum an lak ngah lo tiah thu an phuang lawk nan cuih ni thotho ah “Russia ralkap pawl hrang hman tlak nawn lo khawp ih a siat zo mi airfield cu Russia pawl in an control zo” ti`n an phuang saal.

Russia bat bikmi Kyiv khuapi lak nak ding hmun remcang a si bangin Ukraine cun ziinkong phunphun hawlin dung a siip lo ih ralthuam phunphun suah in Hostomel airfield lak an tum saal ih doawknak nasazet a suak.

Doawknak ah Russia lam an tuar na zet tiah report a um ih, cuih ruangah peng 40 tluk sau, raldo mawṭaw, tank le bomb meithalvuah mawṭaw phunphun cu Kyiv khuapi cilnuai dingin Hostomel airfield .
ziin zawh in an poksuak a si.

Hostomel airfield cu Ukraine ralkap in kan lak saal thei zo tiah an phuang nan Russia lam in kan kut ah a um an ti ve thung.

Hostomel airfield doawk thu cipciar in na siar duh le hinah hmet Battle of Antonov Airport

Leave a Reply

Your email address will not be published. Required fields are marked *