Putin thu suah thar cu Jews ciimit tumtu Hitler hmuithlam a cuang

Ukraine ram luhcilh dingih thusuahtu Russia President Vladimir Putin cu a tumtah mi a tuah suak thei lo ruangah le an cangvai tum dan sunglam thu a puut darh cingcing ruangah a thin hen nak cu a milai pawl par ah a ṭuan thok thlang.

Amah thawn naivaitu a mi rinsan pawl lak ihsin an sunralnak mawhphurtuding a hawl thok rero tiah theih a si.

Rualṭha vekih a zoh mi, Vacation tivek tiang a fehpi mi Russia defence minister Sergei Shoigu par ih a hmuh dan khal a danglam zo. Cuhleiah thu pakhatkhat cang sual pangin Putin aiawh theituding FSB security service hotu Alexander Bortnikov le chief of Russian general staff Valery Gerasimov par khalah pressure nasaten a pe tiah an sung thu pholangtu hminthup pakhat cun Mirror hnen ah a sim.

“A thin so bik pakhat cu US le UK intelligence service pawl in Russia ralkap cangvai danding an rak thei cia ringring. Russia in Ukraine a luhcilh ding thu khal thupeknak a suah hlan ah dik zetin an rak phuang cia. Cun, a mi bat pakhat bet cu Deputy Chief of the General Staff Igor Kostyukov hi a si. A rei hlan ah a sinak hlit sak thei dinhmun a si” tiah amahcun a ti.

Russia President Vladimir Putin in a mi rinsan pawl par ih a hmuh dan a ti danglam mi cu Ralhraang Hitler in 1934 kum, June 30 ihsin July 2 sungih a ham ṭhat nak ding hrang a ralbawi ṭhenkhat le hruaitu ṭhenkhat a thatter ciam co ṭum “Night of the Long Knives lole Operation Hummingbird” tiih koh mi mithat cangvaihnak thawn mithiam pawl in an tahṭhim.

“Hitler ih “Operation Hummingbird” ah mipum 80 luan a that. Amah bangran ih a zuam theituding le a mah direct thupeknak hnuai ah ralkap um thei dingin a lamṭang pawl khal a that. Cumivek hmuithlam cu Russia President Vladimir Putin ah a lang” ti`n an sung thu pholangtu cun a rel.

Russia hruaitu lakah raltho duhlotu an um ih, Ukraine President that dingin, paisa pekin mithat thiam an hlang thu khal, an rak puut darhter ruangah voi 3 rori Ukraine President thih a luat dah zo a si.

Leave a Reply

Your email address will not be published. Required fields are marked *