Pu Trump ih Russia do leet tum dan Idea thar
Ukraine luhcilh thu ah Russia President Putin a fim tuk rak ti dahtu US President hlun Donald Trump cun langlo ralkapnak (false flag operation) thawn Russia do leet dingin idea thar a suah.
Ukraine ram nor ruangah leitlunhuap pursum tuahnak telin hrem nak phunphun ruangih tuar na zet zotu Russia thu thawn pehpar in February 23 ah Pu Trump in hitin a rak rel dah.
“Dollar fang 2 man hremnak le rampi pakhat vun tahṭhim cun, Putin ke kar dan a fim thlak zet” tiah ramnortu Putin a fak ih “US hruaitu pawl santlaihlo thu a si. Kei mah lal seh la cu hivek dinhmun a suak lo ding” a ti.
Tubaite ah President ṭuan lai sehla Moscow ah bomb ka thlak ding ti`n a rel ih, March 6 ah a party hrang New Orleans ih fund hawl nak an nei lai ah Russia do leet dan ding idea thar pakhat a rel suak bet.
Trump calls for US to put Chinese flags on fighter jets and ‘bomb the s*** out of Russia’ https://t.co/97x4836fWs
— The Independent (@Independent) March 6, 2022
Pu Trump cun “China Thantar ben mi raldo vanzam thawn Russia kan kap ding. Cule hitin kan ti ding. China cangvaihnak a si. Kan nih kan si lo kan ti dingih mah le mah an doaw mi cu kan rak cuan men ding” a ti.
Pu Trump hi President a ṭuan lai ah US ral tumbik pakhat a si mi Russia hruaitu Vladimir Putin a fak ṭheu ruangah soisel a hlawh thei zet.
