President an that pang khal le Ukraine cozahpi khawkhanmi nei cia

Ukraine President cu voi 3 rori thah a luat zo ih ramsung buai lai ah a thi pang khal le cozahpi dung an siip tum hlei ah Russia doleet dan ding khawkhanmi an nei cia a si.

CBS news ih Face the Nation program ah US cozah ṭuanvonei Antony Blinken thu an sut ih “Ukraine President a um lo khalle an ram bawm dan ding nan ngaihtuah cia maw” tiah thu an sut.

“Ukraine cozahpi in ‘Plans’ an nei cia. Cozahpi dinhmun ih feh pemzom thei vivo dingin khawkhanmi an nei. Nan, a thuhla cipciar in ka rel lo ding” tiah Antony Blinken in a rel ih President Zelenskyy le Kyiv mipi ralṭhat zia a fak cih.

Russia in Ukraine ram an luhcilh hlan ihsin rampi President an that hmasatum thu a suak ih, rampi a buai laifang, kan dung zarh hrawngah cangvaih an tum nan an hlawhsam.

Cuih thu thawn pehpar in Ukraine National Security and Defence Council sungtel Oleksiy Danilov in hitin a rel.

“Khat le khat doawk duhlotu Russia Federal Security Service sung ihsin thuthup kan dong ih an cangvai man hlan ah kan hruaitu thattuding Kadyrov forces unit cu kan thianfai hmasa” tiah a ti.

Ukraine President Volodymyr Zelenskyy cu Russia in that hmaisabik ding No 1 ih an ret mi a si ih, amah telin an sung zate hrang humhimnak ṭuanvo la dingin US cozah in kut a hlan nan “kan ram le kan miphun pawl ka phat san lo ding” tiah President Volodymyr in a ti.

Siarbet : Voi 3 that luat zo Ukraine President Volodymyr Zelensky

Zarh khat sungah Voi 3 rori Thih/Thah luat fangfang Ukraine President Volodymyr Zelensky

Ukraine President Volodymyr Zelensky cu kan dung zarh sung lawngah voi 3 rori that an tum ih thuhla an dong cia ruangah thih a luat fangfang.

A that tumtu hi Russia cozah thawn naivai awzet, paisa pek ih hlan theih Wagner group company ralkap (Mercenary) pawl le Russia ralkap Chechen special forces pawl an si ih, an cangvaihnak pawl cu hmin tarlang lomi doawknak duhlotu Russia Federal Security Service (FSB) sungtel hnen ihsin Ukraine cozah in thuthup an dong tiah thuhla felfai dongtu The Times in a tarlang.

Ukraine Secretary of National Security and Defense khalin cuih thu cu an nemhnget ih “khat le khat doawk duhlotu double agents hnen ihsin thuthup kan dong mi a si” tiah ramsung media hnen ah an sim thei.

Ukraine President that dingih thlah mi Wagner Group member pawl cu ramsung doawknak a ṭan hlan ihsin Kyiv khawpi ah an thleng man zo ti a si.

Wagner Group hohatu cu Putin thawn naivaizettu Yevgeny Prigozhin a si ih “Putin Chef” tikhalin an ko ṭheu. 2016 US rampi hrilawknak thawn pehparin US cozah ih ralpi pakhat a si…..

Cupawl in that dingih fial mi Ukraine cozah mi thupi 24 pawl ih hmin cazin an kol ti a si ih, cumi hmin cazin ah Ukraine prime minister, cabinet sungtel zate le Kyiv khawpi mayor boxing thong thiam Vitali Klitschko le a unau Wladimir tipawl an tel tiah tarlang a si.

Wagner Group cangvaihdan theiciangtu “Hram” pakhat cun “an sungtel mipum 2000 ihsin 4000 karlak hrawng cu mission dangdang tuah dingin January thla lam ihsin Ukraine ah an thleng thluh zo” tiah The Times hnen ah a sim ih “President that dingih fial mi pawl cun a phone an hack sak ih ziangtiklai khalah a umnak an thei ringring” a ti.

Wagner Group company ralkap pawl in President that ding an ṭhulh saal nak san cu an cangvaihnak thawn pehparmi thuthang a puut darh ih Ukraine cozah in kan dung zarhte zaan ihsin thok, nazi 36 sung curfew an phuang ruangah a si.

“President an that tum thu thuthang don a si ih thlun lo theih lo nazi 36 curfew an phuang. Cumi tikcucaan ih lengsuakvak cu siatsuah nan si ding ti`n cangvai thei lo dingin thu an phuang. Curuangah an ṭhuh saal mi a si” a ti.

Cuvek boruak a um ruangah le ramsung boruak sosang sin ding zum um ruangah Ukraine President cu hmun him ah US cozah in hruai an tum nan “phurhthiar ka mamawh lo. Hriamhrei ralthuam si ka mawmawh” tiah Ukraine President in US President Joe Biden kut hlannak a co hlang lo.

March 1 khalah Russia National Guard Chechen special forces ralkap pawl in Ukraine President that an tum saal nan an hlawh tling lo.

Ukraine President hi that ngah hai bang seh la an ram buainak cu a feh dan a danglam thluh ding tiah ramkhel thiamsang pawl in an zum a si.

Leave a Reply

Your email address will not be published. Required fields are marked *