Pacak Tial Thang tei` sualawknak result thlengdanglam dingin tawlrel

February 11 ih Chin pacak Salai Tial Thang tei` sualawknak cu diriam umlo zetin an ti tawp ih “Zuamawknak Um Lo” (No Contest) tiah an phuang.

Tial Thang in a sualpi Sunoto bawr a sut ngah ti`n referee in a cawlter hai lawk ih Sunoto a cang thei nawn lo ruangah sualawknak an ti tawp mi a si.

Referee cun Tial Thang in Sunoto bawr ah a sut a ti nan, an sualaw lai zohciang cun a bawr siloin a paang/pum sawn ah a sut ngahmi si in a lang.

AunglaNSang ih video tawi post mi khalah ciang zetin a lang ih, cumi video tawi zohtu MMA fighter tamsawn khalin referee in a hmu sual mi a si ti`n an comment hlei ah result ti danglamter dingin dilngennak tuah aw tiah Tial Thang an forh.

MMA fighter pawl ih comment ṭhenkhat

Cuvek thu a um tikah FOM in Tial Thang kan biak ciang ih “result thleng danglam dingin kan tawlrel rero lai” a ti. Asinan, result an thleng saal a si le ziangtin record an tuah ding timi cu a rel tel lo.

MMA fighter pawl cu Fight record an ngai poimawh zetih cangsual lole referee lam tipalhnak a um cun Athletic Commission hnen ah result thleng sak dingin an dil ṭheu ih atakih thlengsakmi khal an um a si.

Siarbet : Pacak Salai Tial Thang tei` sualawknak cu Diriam umlo zetin Tawpter

Chin pacak misualthiam Salai Tial Thang cu, tuni, February 11 ih One Championship Bad Blood sualawk nakah a cangsual ti`n nehnak khal coterlo, sung cuang si loin referee in sualawknak a ti tawp.

Prelim ṭanthok nakah Indonesia rammi Sunoto thawn an sualaw ih, minute 1 hman kim hlan ah Tial Thang in a khuk thawn a sawh mi cun a bawr ah a sawh ngah ti`n referee in sualawknak a ti cawl lawk.

MMA sualawknak ah serh humhimnak Bawr khuh (Cup Groin Protector) an hmang tlangpi ih, Tial Thang ih khuk sawhmi cun a bawr khuh a hnor ih a paang ah a sawh ngah sawnmi si in a lang. Amah Tial Thang khalin a paang/pum ah a si ti`n refree hnen ah a sim. Akap ih zohtu pawl khalin a pum a sut mi a si ti`n an rak au.

Malte an cawl hnu, an sualaw saal ih Tial Thang khuk sawh tuar loin a sualpi Sunoto cu zial ah a ril. Referee in a bawr sut ngah in a hmu ruangah Tial Thang cu yellow card a pe.

Tial Thang sualpi Sunoto cu a nat tuar loin zial ah a talbuai ruangah sualawknak pehzom nawn loin “Zuamawknak Um Lo” (No Contest) tiah sualaw an cemter a si.

MMA voikhat sualaw dingah thla teelin timlamnak an nei cia ṭheu ih, miṭhen cu sungkhat unau hman hmu loin training lak nakah an um cih. Training an tuah tik khalah mah duh dan men ih tuahmi siloin mithiam pawl paisa pekin sualaw an zir. Puaipi a thleng tikih neh nak an co khalah colo khalah training zirpitu pawl cu sumsaw an pe ṭul thotho.

Cuvek a si tikah sualaw tikih cangsualnak tivek a um tikah tikcucaan heu, paisa cem liam le thazaang hmuahhmuah suah ih zirnak an nei mi pawl cu a lak men ah a cang thluh ruangah “Zuamawknak Um Lo” (No Contest) timi cu fighter pawl in an tuar na zet a si.

Tial Thang khal, sualawk cawl in No Contest an phuang cu tuar thei loin a mitthli a tla a si.

Leave a Reply

Your email address will not be published. Required fields are marked *