New York hnakih Let 33 tum mi Khawlipi maktara Neelrawn ram car ah toh tum

Saudi Arabia siangpahrang si leh ding mi Mohammed Bin Salman (MBS) cun leitlun san thuanthu ah a hmin langsar ve beisei in neelrawn ram car ah “NEOM” tiih hminpekmi san man Khawlipi maktara toh a tum.

Egypt ram ih “Pyramids” thawn tehkhinin “Ka Pyramids” tiih a koh mi NEOM khawlipi cu Egypt ihsin nisuahnak lam, Tipi Sen saklam, Saudi Arabia neelrawn ram car ah toh tum a si ih, Thlapi lem le nikhua boruak khal mahten tuah tum cawp a si.

Khua pangai vek, a darh zawng siloin a tung/tlar zawngin tuah tum a si ih, a sang lam meters 500, a sau lam peng 105 (170 kilometers) hrawng si ding ih beisei a si.

Cuih khuatluanpi cu “The Line” tiah hmin pek a si ih, khua thok ihsin a cem tiang Tlangleng an tlanter tum ih, minute 20 hrawng lawng Tlangleng to a ṭul ding ti a si.

Khawlipi an toh tum dan tanglam ah Video zoh … (UPDATE : July 25, 2022)

Boruak nikhua tisia theitu petrol hmang mi mawṭaw an hmang tum lo ih, boruak thawn milawmi Taxi zam thei le san man ceet phunphun lawng hman sian a si ding ti a si.

NEOM khawpi sak nak hrang $500 billion budget an hisap ih, tu dinhmun ah Khawpi toh nak ding kiangkap ih um pawl an dawi rero zo ih hmalaknak an nei ṭan nak a rei phah zo.

NEOM khawlipi toh dingih tawlreltu pawl cun atakih cangsuak thei an zum nan, leitlunhuap technology lam thiamsang pawl cun an tuah khawsuak an zum lo.

Dubai ih tikulh an tuah mi pawl bangin tuah khawsuak lo lole hman theih ngai loin, paisa le tikcucaan heu ter men tu a si thei tiah an hmu.

NEOM khawlipi toh ding thu hi 2017 kum cem lam ah an phuang hmasabik ih, tu kum ah a tharin an phung sal hnu, kan Chin mi lak ah hih hmun ah hnaṭuan a um ding ti`n puaisa pawl bum tuar an um.

Leave a Reply

Your email address will not be published. Required fields are marked *