Mitthli canghnap thawn sungkhat unau ruak an hngak

Nepal vanzam tlak ah a totu zaten an thi thluh ih an ruak pawl zohfelnak an nei lai ah unau sungkhat pawl in mitthli canghnap thawn innleng in an hngak.

Amawngtu telin vanzam totu hi mipum 22 an si ih vanzam tlaknak hmun ah an ruak pawl an sar suak thluh zo.

“Nikhuasia lakah le harnak phunphun pahtlangin vanzam cangsualnak hmun ah a totu ruak pawl hmusuak thluh an si zo”.

“Ruak zaten Kathmandu, Tribhuvan University Teaching Hospital ah autopsy tuah dingin phur thluh an si zo ih, zohciangnak an nei hnu ah sungkhat naivai hnen ah an ruak pawl ap thluh an si ding” ti`n Nepal cozah in Tlawngkai nihnih zing ah thu an suah.

Tara Air 9 NAET vanzam fate cu Pokhara khua ihsin Jomsom lam pan in May 29 zinglam nazi 10 hrawngah a zam suak ih a ṭum nak ding hmun a thlen hlan, minute 5 duh hrawngah a tlak ih a totu zaten an thi thluh.

Atlaknak san hi zirzoi rero lai a si ih, Vanzam thuhla le Nepal nikhua boruak theiciangtu mithiam pawl cun rinlopin nikhua a sia ruangah a tlak mi a si thei ti`n zumnak an nei.

Vanzam tlakmi hi Canada vanzam tuahtu De Havilland kutsuak a si ih, an vanzam pawl cu Nepal ram ah kum 50 lenglo an hmang zo.

A hlun tuk ruangah le nikhua sia thuh ruangah Nepal ram ah atu vanzam tlakmivek 21 lenglo an cangsual zo a si.

Tuṭum, Tara Air line vanzam tlakmi ah Germany rammi 2, India rammi 4 le Nepal rammi 16 pawl an tel a si.

Leave a Reply

Your email address will not be published. Required fields are marked *