Minung 22 tomi Nepal Vanzam a tlak, Atlaknak hmun ah zohman feh thei hrih lo

Nepal ram laili, tourist pawl vehvaiduh zetnak Pokhara ihsin Jomsom khua lam pantu Tara Air 9 NAET vanzam fate cu a zam suak hnu reilote ah pehtlaih theih loin a um.

An zam tum nak hmun Jomsom khua hi Pokhara ihsin minute 20-25 hrawng lawng an rei ṭheu ih, Tara Air 9 NAET cu May 29, zinglam nazi 10 hrawngah Pokhara khua ihsin a zam suak. Vanzam ṭum nak ding Jomsom khua a thlen hlan ah pehtlaih theih nawn loin a um.

“Vanzam mawngtu le hnaṭuantu telin vanzam totu hi mipum 22 an si. German rammi 2, India rammi 4 le Nepal rammi pawl an si. An zam suak hnu minute 15 hrawng rei hnu ah control room lam ihsin an pehtlaih thei nawn lo” tiah Nepal Civil Aviation ṭuanvonei mipakhat cun a rel ih “nikhua sia ruangah a cangsual a si thei” a ti.

Vanzam an pehtlaih thei nawn lo hnu, nazikaar rei hrawngah Mustang district, Kowang khua kiangkap ah vanzam tlak mi a um ti`n khawmi pawl in ralkap hnen ah thuhla an sim thei ih Helicopter thawn an hawl cih nan nikhua a sia ruangah an cawl hrih.

Nepal ram hi Tlangsang tamzetnak hmun a si vekin vansang boruak hi rinlopin a thlengaw ṭheu ruangah Vanzam pawl in harsatnak tumpi an tong ṭheu.

Tuṭum, Tara Air 9 NAET vanzam fate a tlak mi khal hi nikhuasia an puhmawh bikih, boruak a kiang deuh hnu ah mibawm hnaṭuan pawl in an hawl pehzom tum a si.

Hminsin : Tubai ih thil thleng a si vekin khat le khat report dan a bang aw lo ……

Leave a Reply

Your email address will not be published. Required fields are marked *