Manipur ah Kawlram raltlan 100 lenglo an kai, Rawl lo in an ret bet

June 28, zinglam ah Manipur, Churachandpur district ih khawsa Kawlram raltlan 100 lenglo cu ramkulh cozah thupeknak thawn an kai khih tiah theih a si.

Nauhak telin Kawlrammi raltlan kaihkhih an si thu ah Citizens Committee, Manipur (CCM) pawlkom in ramkulh cozah an dem ih mipangai le raltlan zohkhen dan pangai vekin ṭha zetih rak zoh dingin dilngennak an nei.

Citizens Committee, Manipur (CCM) pawlkom thusuah dan ah Kawlrammi raltlan pawl hi Tlawngkai nihnih zingpit ah an kai ti a si ih, palikzung ah an khum hnu ah sun hnu tiang ziang ei ding khal an pe lo tiah tarlang a si.

CCM ih ṭuanvonei mipakhat in “Zaanlam tlai hnu tiang ei-in ding an pe lo hlei ah zaantlai tiangah an thuhla relsaknak hrang ding hmalaknak zianghman an tuah sak lo. Imphal lam ah an kuat tilawng thuthang kan thei. Abikin nauhak le an tel tikah ruah har an um zet. ziangvek dinhmun an si ti kan thei ciang lo” tiah a ti.

CCM cun ramkulh cozah kaihkhihmi Kawlram raltlan pawl an ngaih tuah zet ih Kawlram mipi harsatnak theihpi in international human rights daan vekin raltlan zohkhen dingah ramkulh cozah a dilngen cih.

Cuhleiah Mizoram cozah bangin Kawlram raltlan zohkhen ve dingah thuron an pe cih ih “an ram ah kuat sal ding an si hrimhrim lo” tiah thusuahmi ah an ngan tel.

CCM ih tarlang dan ah Manipur cozah hin tu ṭum vek thotho in 1988 Kawlram buai ruangih raltlan pawl khal a rak zoh ṭha lo ti a si.

Leave a Reply

Your email address will not be published. Required fields are marked *