Leitlunpi hrang tuksumza Russia cangvaihnak

Europe mualpi hrang lawng si lo, leitlunhuap pursumtuahnak tlaksiater theitu cangvaihnak cu Russia ralkap in tu ni March 4 ah an tuah.

Ukraine ih um Europe mualpi nuclear power plant tumbik (Zaporizhzhia nuclear power plant)cu Tank thawn an kap ih kaangmei a suak.

“Russia ralkap pawl in thil hmutlang theimi Tank hmangin Zaporizhzhia nuclear power plant an kap. Ziangvek siatralnak a suak thei ti thei cingin an kap hrim. Himi kap dingin timlamnak an nei cia. Nan, hnaṭuan pawl in mei an phal man ih atomic power station an ti him” tiah Ukraine president Zelenskyy in a ti.

Rapthlakza Russia ralkap cangvaihnak ruangah leitlun mifim pawl an lau thluh ih Ukraine president le US President Joe Biden khal direct in phone an biakaw phah. US Department of Energy khalin nuclear incident response team an rak ti nung man tiah Joe Biden in a ti.

Ukraine President Volodymyr Zelenskyy cun “leitlun san thuanthu ah Russia baakloin atomic power plant reactors a kaptu ram an um hrih lo. Mihring ruahnak thawn suangtuah theihlomi Nuclear siatralnak a thleng hlan ah Russia ralkap pawl ti cawl dingin European hruaitu pawl nan ṭhangharh a ṭul thlang. Nuclear siatralnak a suak cun mizate hrangih ni netabik a si. Europe tlaksiat ni a si” tiah a rel ih “atufang ah Europe hruaitu pawl ih hmanhmawh thuthluk cangvaihnak lawngin Russia ralkap a kham thei. Nuclear siatralnak thawn Europe rampi a siat hlan ah zamrangten kham uh si” a ti.

Russia ralkap cun Zaporizhzhia Nuclear reactor pakhat um nak kiang an kap ngah ih kaang mei a suak. Nan, cumi cu tuhlan ihsin an rak rem reromi a si ruangah hnaṭuanter hrih loin an ret ṭha mi a si. Nan, a sung ah “nuclear Fuel” a um ti`n Nuclear plant spokesman Andriy Tuz in Ukraine media hnen ah a sim ih “mei kan phal thei saal” a ti.

Nuclear thawn pehpar mi cuih hmun ih ceet pawl cu atu ah an thi ter lawk ih, tu dinhmun tiang cu mipi hrang phan ding zianghman a um hrih lo tiah satellite lam ihsin siseh, a hmun naivai ih zohhliahtu mithiam pawl in an rel.

Asinan, Russia ralkap pawl cu dung kir cuang loin Ukraine ram ah an um lai ruangah ramsung dinhmum cu ziangvekin, ziangtikah a danglam ding timi cu zo hman in an rel thei lo a si.

Leave a Reply

Your email address will not be published. Required fields are marked *