Khawlaili rori ah Tlawngta fala naam thawn hlep that, mipi in kiangkap ihsin zoh men

Egypt, Mansoura University ih Tlawngkailai fala Naira Ashraf Abdel Qader cu sunvanglai lamziinpi rori ah a tlawngkaipi Mohammed in naam thawn a hlep that.

Mohammed A tilawng ih a hmin tarlangmi mithattu hin Naira Ashraf a ngaizawng ih nunau in a duh lo ruangah rapthlak zetin a that mi a si.

Tlawnginn ihsin a suak pekte, Bus a to hlan ah Mohammed in a buaipi cih tiah a hmutu pawl cun an rel ih kiangkap naivai ihsin a hmutu an um nan bawm tum hran loin an zoh men.

A that lai fang, CCTV zuk ngah mi video tawi puut darh mi ah Mohammed in kut a thlak lai a lang. Kiangkap ah mawṭaw tampi a cawl hlei ah lamziin kap ih rak um mipi khal an um nan, miṭhen cun phone thawn an rak zuk men.

Mohammed cun a thong ih a tluk hnu ah ziinkap fehnak concrete ah a Lu a sut bet. Cuhnu ah naam a phorh ih kaingkap in an kai tum cu a hngawng a hlep man. A tluk hlan khalah naam thawn a dawt ti`n palik report ah a um. Fala Naira Ashraf cu a hmun rori ah a nunnak a cem cih.

Mohammed cu an kai ih palik kut ah an ap hnu ah palik hnen ah a that nak san a phuangaw. “Social media ah in block ruangah le neiawk el in, in duh thei lo ruangah sibik” a ti.

Fala Naira Ashraf ih pa interview an tuah mi ah “voikhat napi hringhro a tuar zo. Palik hnen khalah report kan tuah dah” tiah a ti.

Egypt cozah hi nunau humkham ṭha thei lo ti`n leitlunhuap human rights pawlkom pawl ih soisel a hlawh zet ih tu ṭum thahawknak thu khalah palik le cozahpi nasaten an dem.

Egypt hi leitlunhuap nuanu himlobik ram pawl lakih langsar ve lam a si ih, kum 2013 UN’s Enitity for Gender Equality zirzoinak tuahmi ah ramsung nunau zaṭek 99% (estimated) cu ziangtizawng tal in zahmawh rimnam suamnak an tuar ti an hmusuak.

Atambik cu taksa dapawknak (lole nunau ningzakding khawpin tisa cakhiarnak hmuihmel thawn zoh hrim) a si ih a sangtu ah zahmawh rimnam ṭongkamsia phuthrimnak a si.

Ramdangmi nunau tourist pawl in Egypt an tlawng ding tikih thucah tambik cu mahten khawihman vakloding ti a si ih, mahten vaksuakin mawṭaw tonak ah mipa bua zit ka tuar titu nunau tourist an tam.

State gov website report dan ah Egypt ramsung mipi zaṭek 90% cu Sunni Muslim an si ih, 10% hi Christian an si. Christian zaṭek 90% hi Coptic Orthodox biaknak fehpitu an si.

Leave a Reply

Your email address will not be published. Required fields are marked *