Kah that mi Al Jazeera journalist ruak an vui lai ah buainak maksak a suak

Israel ralkap in raltlan umnak hmun an luhcilh laifang ih kahthatmi journalist Shereen Abu Aqleh (kum 51) ruak an vui lai ah buainak a suak ih an ruak kuang tiang a tla phah zik.

Palestine buainak le Middle-East buainak pawl zirzoi pholang ṭheutu journalist Shereen Abu Aqleh cu May 11 ah an kap that.

Amahhi leitlun media hminthang Al Jazeera hrang kum 25 lenglo hna rak ṭuan zotu a si ih, Middle-East buainak pawl lamṭan nei hran loin dik zetih thuthang phuang ṭheutu tiah theihlarmi a si.

Thuthang latu ti thei thiam ding ih thuamaw cingin kah that a si mi thu ah Israel ralkap dem tu an tam ih a kaptu cu daan vekin hremnak pe tengteng dingin leitlun mipi in an dil ngen.

Palestine cozah cun Abu Aqleh hi Israel ralkap kah that hrimmi sivekin thu an suah nan Israel lam khalin kan mah rori kan si ti`n puh theih a si lo an ti ve thung ih Abu Aqleh thih thu ah an tuarpi thu le thuhla felfai zirzoi an tum thu, official in an phuang.

Asinan, Abu Aqleh an kah lai ih um ve, a hnaṭuanpi mipahnih cun Israel ralkap in hmunhla ihsin sniper thawn an kap mi a si thei ti`n an rel ve.

Abu Aqleh an kah thatnak Palestine ram, Jenin khua ah kahawknak a suak thei zetih Israel ralkap in an ral pawl umnak hmun an luhcilh ṭheu.

Abu Aqleh an kah that ni khalah a hmun ih umvetu Associated Press photographer in meithal le bomb puah thawm a thei thu a rel ih Israel ralkap in ralthuam phunphun kengin inn pakhat an kulh ih kahawknak a suak a ti.

Palestinian Health Ministry cun cuih ni buainak ah hriamtuar khawmi 13 an um ti`n thu an suah ih “Shereen Abu Aqleh kah that nak cerek kan zoh ciang hnu ah international criminal court tiang thlen pi in thubuai kan tuah ding” ti`n an tarlang.

Israel ralkap zungpi khalin Palestine pawlin in kap ruangah kan commando pakhat a thi ti`n thu an suah ve.

Shereen Abu Aqleh ruak vui lai an buai nak san cu Israel ralkap pawl in ruak kuang ih Palestine thantar an hnukthlak tum ruangah a si ti`n ramsung hram bun media pawl ah tarlang a si.

Leave a Reply

Your email address will not be published. Required fields are marked *