Joshua “The Fearless“ Van in mawi tuk in a sualpi a neh
May 15, US ram, Denver ih tuahmi Fury Fighting Championships sualawk puaipi ah Chin micak Van Bawi Thawng (Josh “The Fearless” Van) in a sualpi mawi tukin a neh.
Mario Suazo thawn minute 5 sung, round 3 sualawding an si ih round 1 nak ihsin Josh Van in a neh deuh in a lang.
Mario Suazo dung a siip tam nan, voikhat cu Josh Van in a thong tluk ih zial ah an talbuai lai ah a kut merh fuh in Chin pacak a sung leuleu lawk.
Round hnihnak khalah Josh Van in a nor deuh in a lang ih round cemhlan second fang duh ah mawi zetin a Ke a merh sak. A sung pek lo cun Ke kiak ṭul dinhmun a si ruangah a sualpi cun a sung a pe.
Van Bawi Thawng (Josh “The Fearless” Van) cu zo a si?
Van Bawi Thawng (Josh “The Fearless” Van) cu Hakha peng, Ruan khawmi Pu Uk Tu le Hniarlawn khawmi Pi Ca Zi tei` fapa a si.
Kum 2013 ah Malaysia ihsin US ram ah a thleng. Kum 2017 hrawngin gym a lut thok ih, Professional MMA fighter dinhmun in mi a sual hmasabik cu 2020-2021 ah a si. Fury Fighting Championships kaihruainak hnuai ah Tonatiuh Esquivel thawn an sualaw ih round 2nak ah nehnak a co cih.
Amah hi kum 20 luan fang a si ih, hmailam hrang a tumtahbik cu MMA khawvel ih pawlkom picangbik UFC ih tel thei ding hi a si.
US ram, Texas ih din thok mi Fury Fighting Championships cu leitlunhuap hminthangtuk cu a si lo nan, UFC ih telbanve MMA fighter Adrian Yanez, Daniel Pineda, Juan Adams, Ike Villenuava, Trevin Giles, Ryan Spann, Anthony Ivy tipawl hringsuaktu MMA pawlkom pakhat a si.
Van Bawi Thawng Fight record – (Josh “The Fearless” Van)
