Iraq ram ah rapthlakza Vutneel Thlisia a huuk, mizateel siizung an thleng

Iraq ram ah hnawmbal le vutneel Thlisia a huuk ih boruak rong a dang thluh. Mizateel siizung an thleng ih Baghdad vanzam tualrawnpi khal an phit.

Fimzirzung telin cozah zung ṭhenkhat le Tlawng ṭhenkhat khal, nikhatsung cozah in a phitter.

Thlisia cu abikin Iraq khawpi Baghdad ah a huuk zual ih, Peng dang telin siizung thleng mina zaten 4000 luan an si.

Siizung thleng mina 4000 luan cu thawthawt harsa ruangah ti a si, an zaten ṭha zetin enkol an si ti`n health ministry spokesman Seif al-Badr in a rel.

Iraq ram hi 2022, April thlalai hrawngin thlisia in a nuai thok ih atu ih a huuk mi cu voi 8nak a si.

Tuhlan, Thilsia huuk netabik ṭum ah mipum 5000 lenglo siizung an thleng ih mipakhat a thi.

Dust storm hits Iraq's Baghdad.
📸 @SabahAfp #AFP pic.twitter.com/O1BuR5BqKf

— AFP Photo (@AFPphoto) May 16, 2022

Iraq cu neelrawn ramcar ih um a si ih, vutneel thlisia a huuk thei zet hlei ah ruah sur loin boruak a hlum tuk ruangah Ṭhalpi a thlen tikah thlaicin nung thei loin thla teel in Lothlo pawl harsatnak an tong ṭheu a si.