India – Thla 6 sungah Christian si ruangih Thattuar Mipum 6 an um zo
India : Anung Pathian biak mi Christian si ruang ih that tuar, tukum sungah mipum 6 an um zo tiah Christian pawlkom Persecution Relief in a phuang.
That tuar mipum 6 lak ihsin nunau 2 le kum 10 nauhak pakhat cu pawngsual hnu ah an that mi a si ti`n July 28 ni ih Persecution Relief report ngan mi ah a tel.
Pro-Hindu a si mi Bharatiya Janata Party (BJP) in kum 2014 ah Delhi le India ramsung state ṭhenkhat ah a lal hnu in, hivekin India ramsung ah Christian hremnak a luar sinsin ih India ramsung State 29 ah State 22 pawl ihsin Christian hremnak report a um thu khal, cuih report sung ah a tel.
Christian dodaltu tamsawn cu India ram pumpiluk biaknak hmuahhmuah, Hindu biaknak ih thleng duhtu right-wing Hindus pawl an siih Christian pawl ih cangvaihnak le missionary hnaṭuan hnaihnok, tibuai ringringtu an si.
Abikin, India mipum kharhcak biknak Uttar Pradesh ah Christian hremnak a luar cuang ih cuih hmun ah cun Pathian nung biaktui` inn, biak-inn pawl an urkaang sak ṭheu ih khuatlang mipi hman mi tidai, electric tivekkhal hmang siang loin an chat sak ṭheu a si.
Persecution Relief founder Shibu Thomas cun, “India ramsung Christian hremnak cu a hlan hnak in zaṭek 40% in a karh. Anung mi Pathian biak ruangih thattuar, tukum sung lawng ah mipum 6 an um. A tui` report nak cu kan mah hmuh theih cin lawng a si. khaute ih um Christian hmuhsuamtuar tamsawn cu Pro-Hindu pawl in an in-ti line, meisa hri tivek an chat sak ṭheu ruangah ṭuanvo neitu pawl hnen ah an report ngam lo.” a ti.
India ramsung Christian hremhmang ṭihnungbik khua cu Jharkhand, Odisha le Chhattisgarh pawl an siih, tukum sungih Christian thattuar mipum 6 khal hih hmun pawl ih ummi an si.
India ram cu tuhlan kum 7 hrawng ah Christian hremhmang ram hril mi ram 31 nak a si nan, tuah, ram 10 nak dinhmun ah a ding a si.
ref:UN
