India ram ah Natnak danglam ciikhat a suak ih Mipi Thlaphang in an um

Covid 19 ralpi do rero lai, India ram ah mithiam pawl ih theihthiam lomi natnak danglamzet a suak ih hih natnak ruangah minung 300 luan Siizung an thleng tiah TOI in a tarlang.

Nat a suak nak cu Andhra Pradesh, Eluru khua ah a siih mina tuamhlawmnak cozah siizung ṭuanvoneitu pawl cun nihnih sungah luakluak, lungciimit ih tluk, Ceih le Ka sungin ciilphul pawt natnak danglam zet neitu mipum 345 cu kan siizung ah kan tuamhlawm tiah an tarlang.

Natnak danglam a si ruangah mina pawl dinhmun zoh dingin Deputy Chief Minister and Health Minister Alla Kali Krishna Srinivas rori in Siizung ah feh in a va vehvai hai.

Athok ahcun in-ti lole boruak thianglo pollution ruangih suak mi natnak siding an zum lawk nan thilumdan zohciangnak an nei hnu ah cumi pawl ruangih suak mi natnak a si lo tiah official in an phuang sal a si.

Hih thuthawn pehpar in Deputy Chief Minister and Health Minister Alla Kali Krishna Srinivas cun “tui dinhmun tiang cu ziang natnak a si timi kan thei ciang lo. Tidai sia in ruangah le pollution ruangah cu a si lo. Cun, cozah siizung ih piahawk pawl ah Covid 19 natnei an um lo.”

“Tu ah, mina pawl ih thisen cu mithiam pawl zohciang dingin Lap ah kan kuat zo. Cumi result suak lawng ah ziang a si timi kan thei ding” a ti.

Natnak danglam tuartu lak ah nauhak kum 4 mi khal an um tiah Siizung lam in thuthang an suah ih Siizung thleng mina hrek zikte cu kan tuamhlawm hnu ah an mah le umnak cio ah kan tlun ter zo ti`n thuthang an suah a si.

Himi natnak danglam ruangah mi pakhat a thi zo ih Siizung thlenghnu damsal ih tlungzotu khal an um hnuaihni zo nan ziang natnakbik a si timi theihcian a si lo ruangah Cozah lam in ralringten um cio dingin Eluru khua ah tlangthannak a nei a si.

Leave a Reply

Your email address will not be published. Required fields are marked *