India cozah in Ukraine raltlan bawmtuding Japan vanzam a ram ah a ṭum siang lo

Ukraine raltlan pawl bawmnak petuding Japan thilphur vanzam cu India cozah in a ram ah a ṭum sianglo ruangah raltlan bomtummi an ṭhluh phah thluh.

An tumtah dan cu UN High Commissioner for Refugees dilngennak vekin Japan Air Self-Defense Force C-2 vanzam thawn UN agency retṭhatmi raltlan bawmnakding bungrua pawl cu India le Arab ah lak phahin Poland le Romania ih Ukraine raltlan pawl bomnak va pe ding an si nan India cozah in a ram ah a ṭum sianglo ruangah an ṭhulh salmi a si.

Japan cozah official thusuah dan ah India hin an ram ih retṭhatmi raltlan bawmnak bungrua lak dingin a lungkim zo nan rinlopin an thu an ṭhin saal ti a si ih, ziangruangah an thu an ṭhin timi cu felfai in thu an suah lo.

Russia cozah thawn naivaiawzettu India cozah cu atufang leitlunpi buaipi zetmi Russia-Ukraine buainak thu ah zianghman ṭong duh lo remrem in a um hlei ah Russia cangvaihdan dem duh loin buainak theilo vekih umawtertu rampi pakhat a si.

Asinan, Ukraine raltlan bawmtuding vanzam an ṭum sianglo thu ah Japan hruaitu ṭhenkhat cun kan cozah in hmalaknak a nei tawklo ruangah a si ti`n an ram cozah riangri an dem.

Leave a Reply

Your email address will not be published. Required fields are marked *