Hminthang Football star Maradona nazi hlo cu India ram lamlam ah an hmusuak

Leitlun Football khawvel ih hminthang, mualliamzo Diego Maradona ih Hublot nazi mankhung cu Dubai ihsin a hlo hnu, India, Assam ram ah an hmusaal tiah theih a si.

Thilmankhung le thil thupi an ret ṭhat ṭheu nak UAE, Dubai ram security company ih hnaṭuantu Indiami kutsung ah kan hmumi a si tiah palikbawi Bhaskar Jyoti Mahanta in a rel.

Afirtu tiih puhtuar Indiami cun a pa damlonak puhmawh in India ram ah colh la in a tlung ih India a thlen hnu, December 11, zing nazi 4 ah Assam palik in an kai.

“Dubai Security company ah ni malte hna a ṭuan hnu ah, a pa damlonak puhmawh in August thla ah Assaam ah a ra tlung saal.”

“Maradona nazi retnak “safe” boh thu thawn pehparnak a nei ti`n Dubai lam ihsin thuthang kan dong ih kan kaimi a si. Ramhnih palik hnaṭuannak thawngin kan kai theimi a si” tiah palikbawi cun a rel.

Nazi firtu tiih puhmi Indiami cu palik kut ah a um zo ih, thuhla zirzoinak an nei peh hnu ah daan le dun vekin hmalaknak nei pehzom vivo a si ding tiah palikbawi cun a rel bet hrih.

Leave a Reply

Your email address will not be published. Required fields are marked *