Hepatitis C virus hmusuaktu Scientists pathum in Nobel Prize sunloihnak Dong
2020 kum hrang Sii vai thawn pehpar mi sunloihnak ropi Noble Prize cu Hepatitis C virus hmusuaktu scientists pathum in an ngah.
Sii vai thawn pehpar mi Noble Prize sunloihnak cotu cu American scientist Harvey J Alter, Charles M Rice le British scientist Michael Houghton pawl an siih an hmuhsuah mi hin minung tamzet nunnak a ti him tiah Noble Committee hotu Thomas Perlmann in a sim.
Hepatitis C virus cu thisen thunnak ihsin nat suan aw an tambik ih nathrik cangvaihdan hmuhsuah ciang a si hlan ahcun Hepatitis non-A, non-B ti`n an ko.
Virus hmuhsuah/theih ciang a si hnu in Hepatitis C nei le neilo thisen check nak tuahsuah thei a si ih a dokham danding khal an tawlrel thei vivo.
Hepatitis C hin thin cancer a suak ter ih tu fangah leitlun huap Hepatitis C nat neitu mipum 71 million lenglo an um.