Donald Trump in “Truth Social App” a thlah veten ti buai dan ding an tawlrel cih

Thu phunphun ruangah leitlun Social media platform tumbik Facebook le Twitter ihsin hnon a si mi US President hlun Donald Trump cun “Truth Social” timi social media platform pakhat cu February 21 ah official in a thlah suak.

A zalen mi social media ka tuah ding tiih a rak rel cia bangin amah company a si mi Trump Media & Technology Group ih tuah sak mi a si ih “President Day” thawn dengaw in February 21 ah tlangzarhnak an nei hrim.

iPhone (iOS 13 version lole cuhnu ih suak cin) thawn lawng hman theih dingin Apple App Store ah thlah sung a si hrih ih, Techcrunch tarlang mivek asile app an thlah hnu, nikhat sungah Apple App Store ih download tu nei tambik a si.

Trump Media & Technology Group CEO Devin Nunes cun
Company picang Technology kan hmang thei lo ruangah a taw thok rorin kan mahten kan tuah tiah a rel nan, “A sung umdan le a hman dan pawl cu Twitter an cawng” tiih soiseltu an um.

Cuhleiah, UK hrambun company fate pakhat (@SolarTrailar) cun kan Logo in cawng ti`n Pu Trump company cu Daan khih san in ralrinpek theihternak an nei zo ih, Technology lam Daan thiam pawl cun tayacuaiawknak tivek tiang a suak thei tiah an rel.

Tu dinhmun ah Truth Social cu a thar tuk lai ruangah remṭulmi tamzet a um lai ih, a download thei cin miṭhenkhat cun a diklo pipin a lang phahphah tiah an rel.

Canada le US ram ih iPhone hmang cin miṭhenkhat lawngin an download thei hrih ih, mitam hmang theih dingih remṭha vivo in, an lam a tluang vivo asile Android version cu March thla lamah an thlah tum tiah theih a si.

Pu Trump le a company hnaṭuan pawl cun “Truth Social” cu a zalen mi thutinkim rel theih dingih tuahmi a si tiah an rel nan, cuvek policy cekci fehpitu Parle app cu Daan nan buar ti`n Apple App Store le Android Play Store ihsin an rak hlon hlo dah a si.

Leave a Reply

Your email address will not be published. Required fields are marked *