Covid 19 dokhamsii Phun 2 dawt rawi ṭhat zia an hmu suak

South Korea ram ih mithiam pawl zirzoinak ah Covid 19 dokhamnak hrangah AstraZeneca le Pfizer/BioNTech vaccine dawt rawi ṭhat zia an hmusuak a si.

“British-Swedish company suak AstraZeneca Covid 19 vaccine dawt hmasa hnu ah a dose hnih nakah Pfizer Covid 19 vaccine kan hmang cu AstraZeneca vaccine doses 2 dawt pawl hnakin antibody level let 6 in a sang” tiah Korea Disease Control and Prevention Agency (KDCA) in an phuang.

Zirzoinak ih medical workers mipum 499 ah mipum 100 in vaccine phun 2 cawk rawi (dose dangdang) an dawt. Mipum 200 in Pfizer/BioNTech vaccine (doses 2) an dawt ih atangmi mipum 199 in AstraZeneca vaccine (doses 2) an dawt.

Vaccine cun cells sung ih virus lut tummi le a karh ter tummi pawl a kham ih, cumi ah voihnihten Pfizer Covid dokhamsii dawt tu hnakin dose khatnakah AstraZeneca, Dose 2 nakah Pfizer vaccine dawttu tisa cun virus lut tummi a kham dan let 6 in a cak sawn timi an hmusuak a si.

“Himi kan hmusuah mi hi ṭhathnemnak tumzet a nei. Leitlun ram ṭhenkhat ah AstraZeneca Covid vaccine dose hnih nak dawt ruangih thisen hlom suakin buainak tongtu an um. Nan, tuahcun AstraZeneca dose 2 nak aiawh ah vaccine dang hman a theih timi kan langter a si” tiah KDCA ṭuanvonei mipakhat cun a rel.

Kandung June thlacem lam khalah UK thiamsang pawl in Covid 19 vaccine dose cawkpolh ṭhat zia an hmusuak zo ih dose khat nakah AstraZeneca, dose hnih nakah Pfizer dawt pawl hnakin Pfizer dawt hnu ih AstraZeneca dawt bet pawl tisa hin Covid nathrik a kham cak sawn timi an hmusuak a si.

Leave a Reply

Your email address will not be published. Required fields are marked *