Yangon khuasung ah kapawknak a suak

Tuizing June 29 zinglam nazi 11 hrawng ah Yangon, Tamwe myone, Economic bank hmai ah palik pakhat an kap that tiah theih a si ih cuhnu reilote ah cuih hmun kiangkap ah SAC ralhraang cangvai in kahdonak a suak a si.

Ralhraang pawl cun hriamhrei ralthuam rinsan in lamziintluan ah meithal an kap phah vivo ruangah kaiangkap ih um mi 2 hriam an tuar.

Laeyar Shwe Myay ziinpi ih um mipakhat cun “Palik kaptu an timi thawn ralhraang pawl an kapaw ti`n kan thei. Lamziin ah meithal an kap phah vivo ih kan veng sung lawngah hriam tuar 2 an um. Hmun dangdang khal ah meithal an kap phah vivo ruangah hriam tuar pakhat le mithi 1 an um” a ti.

Zaanlam nazi 2 tiang hrawngah meithal puak thawm theih ding a um lai tiah veng sung um pawl in an rel ih hriam tuar um zet le hriam tuartu dinhmun khal theih felfai a si lo.

Tudinhmun ah ralhraang pawl cun Lamziin ṭhenkhat an phit ih ziinkap ih inn ṭhenkhat le YNO hotel an luh cilh tiah veng sung um pawl in an rel.

Kahdonak thuthawn pehpar in SAC ralhraang lam cun thuthang an suah hrih lo nan ralhraang lam ṭang media ṭhenkhat cun palik kap thattu cu mawṭaw sungah an kap that tiah an tarlang.

Leave a Reply

Your email address will not be published. Required fields are marked *