Yangon ih Leithuai zin cu Khawtlang mipi an zawh siang hrih lo

Yangon ih leithuai zin tuah hmaisabik cu 2021, October 8 ah ralhraangbawi Min Aung Hlaing in a ong zo nan tuni tiang hman an siang hrih lo tiah theih a si.

Yangon ramṭhen, Kamayuat myone , Pyi zinpi ih Leihnuai zin cu TTC tlawng ihsin Junction Square bazar tiang fehtlang thei dingih tuahmi a si ih, SAC ralhraang hohanak thawn onpuai an tuah zo nan October 19 tiangah zin hman an siang hrih lo tiah kiangkap naivai ih um pawl in an rel.

“Onpuai an tuah nak ni 10 a luan zo nan tuini tiangah Leithuai zin zawhtu mipi kan hmu hrih lo. A lut suaknak pawl ah ralkap le palik 4 fingfing in an kil” tiah Pyi zinpi ih umtu mipakhat in a rel.

Leithuai lamzin onpuai an tuah ṭum ah “Leithuai zin le Leithuai Tlangleng pawl hi kan ram in kan ṭul leh ding. Curuangah a tuah dan ding ngaihven in hmalak kan tum cio pei” tiah Min Aung Hlaing in a ti.

Asanglam pii 11, akauhlam pii 40, athuklam pii 15 le nazi pakhat sungah mipum 6000 feh theih dingih tuahmi Yangon ih Leihnuai zin cu NLD cozah san ihsin an rak tuahzomi a si.

Leave a Reply

Your email address will not be published. Required fields are marked *