Yangon bomb puak ih mithi um sun cu Bomb puah tu bik PDF ralkap a si – SAC ralhraang

May 31, zaanlam nazi 3 hrawng ih Yangon khawsung bomb puak ah a puahtu PDF ralkap a thi ti`n SAC ralhraang lam in thu an than.

Mithi cu kum 26mi Ṭhin Lin Htun a si ti`n ralhraang thuphuangtu Zaw Min Htun in June 1 ah media hnen ah a sim.

“A phone kan zoh ciang tikah bomb puah fialawknak cakuat pawl kan hmu. Amah khal PDF ralkap a si. Kyauktada phone dawr ih hnaṭuan a si ti`n kan thei. Zirzoinak kan nei peh vivo lai” tiah ZMT cun a rel.

Ralhraang lam cun bomb puak nak kiangkap ih CCTV le a phone sung ih thuhla cipciar pawl zohin amah rori bomb puahtu a si ti`n an puh.

Mizaan, Yangon khawlaili, Mawṭaw hngahnak bomb puak ah hriam tuar 10 an um ih mipakhat cu siizung thlen hnu ah a thi.

Ralhraang lam in PDF cangvaihnak a si ti`n mipi ralkap an puh bangin Dothlengnak thapetu le NUG cozah hruaitu ṭhenkhat in ralhraang SAC cozah an puh ve thung ih, a hranten zirzoinak an nei ve tum a si.

Siarbet : Yangon bomb puak thu ah NUG in a hranten zirzoinak nei ding

May 31, Yangon khawlaili bomb puak thu thawn pehpar in NUG cozah in a hranten zirzoinak a nei ding ti`n defence minister U Yee Mon in a ti.

“Zo an va si khalah himi puakkuainak cu kan dem a si. Thil kan ti theinak zate suah in thuhla kan zirzoi ding ih hmalaknak kan nei ding” tiah U Yee Mon cun a ti.

May 31, Yangon khawlaili bus hngahnak hmun bomb puak ah mipi hriam tuar 10 an um ih kum 30 kiangkapmi mipa pakhat cu siizung thlen hnu ah a thi.

Ralhraang SAC cozah cun PDF an puh ih bomb puaknak kiangkap ah a puak hrih lomi bomb pakhat kan phelh ngah ti`n AFP hnen ah an sim.

Dothlennak thapetu mipi lam cun ralhraang SAC ralkap an puh ve thung ih leitlun mipi hmai ah PDF ti hminsia tum in an cangvai hrimmi a si ti`n SAC ralhraang mawh an puh.

Dr. SaSa khalin ralhraang cangvaihnak si ding a zum thu a rel ve ih “theitawk suahin mipi hrangah a dikmi hmalaknak nei sak a si ding” tiah a ti.

Leave a Reply

Your email address will not be published. Required fields are marked *