Voi 4 Thih daan tat mi Yangon mino umnak zo hman in an thei lo

Ralhraang ralkap kut sung ih um voi 4 Thih Daan tat mi Yangon mino Ko Htet Pine Soe cu a sungkhat naivai thawn tongaw an siang lo hlei ah Insein ih a thawngtlakpi pawl siseh, sunglamthu theitu pawl khalin a umnak an thei lo.

Amah hi kan dung kum July thla ih South Dagon vengbawi that tuar thu thawn pehparin ralhraang ralkap kaihkhihmi a si ih an kai hnu, thla 5 nakah Thih daan tat mi a si.

Ko Htet Pine Soe, kum 27, cu mithatnak voi 4 pawl ah a telve ti`n ralhraang ralkap thubuai tuahsakmi a si ih, Insein thawnginn ih thah ding mi Thawngtlak pawl retnak hmun No.2 innpi ah an ret lawk nan, July 26 zaan nazi 7 hrawngah ralhraang ralkap pawl in an hruaisuak ih cuhnu ah a umnak zohmanin an thei nawn lo.

“Amah thawn kaihtlangmi thih daan tat thawngtlak pawl thawn an ret khawm nan, khaw thim hnu ah amahlawng rinlopin an hruai suak ih, thinphang mit pawt thluh zik ko in a ṭap” tiah amahthawn naivai, sunglamthu theitu mipakhat in Myanmar Now hnen ah a sim.

A nu le pa sungkhat naivai pawl in ton an tum nan July 28 tiangah an tong thei hrih lo ih, an ṭhawt nak hmun khal an zirzoi nan ziangtikong hmanin an thei thei lo.

Amahthawn naivaitu mipakhat khalin “ralkap pawl thu kan sut tikah Thawnginn ah a um ko in ti. Cubaak an rel duh lo. A umnak an rel duh lo. A umnak kan thei pangah ti`n July 28 ah parcel le paisa Thawng inn ah kan ap” tiah a rel ih “thlacamsak baak lo cu ti theih dang kan nei si lo” a ti.

Ko Htet Pine Soe cu tangdor nunnei, mibawm peih, Gym ih hriselnak lam zirhtu a si ih, kaihkhih a si hnu in an innsang zaten an ṭhek darh aw thluh tiah an sim.

Ko Htet Pine Soe (kum 27), Zuk : Myanmar Now

AAPP (နိုင်ငံရေးအကျဉ်းသားများကူညီစောင့်ရှောက်ရေးအသင်း) ngan khum mi vek a si le kan rampi a buai hnu ah Ralhraang ralkap in thih daan tat mi mipum 100 luan an nei zo ti a si ih, cumi sungin mi 4 pawl thlai that an si zo thu cu an mah ralhraang pawl in July 25 ah official in an phuang zo.

Thah tuar mi 4 pawl cu Phyo Zeya Thaw, kum 41, Kyaw Min Yu, kum 53, Hla Myo Aung le Aung Thura Zaw tipawl an si ih, an hnu ah thlai that mi an nei bet tiah thuthang a suak nan namhngetnak zianghman a um hrih lo.

Siarbet : Insein Thawngtlak pawl duhphorh dan thlengh danglam

Ralhraang ralkap in Ko Jimmy le Phyo Zaya Thaw telin mi 4 an thlai that hnu ah, hremawknak a um ding ti thei cingin Insein thawngtlak pawl cun ralhraang ralkap thu ṭhen dan kan duh lo ti`n thawnginn sung ah duhphorhnak an nei ih, Ralhraang ralkap lam in thazaang hmangin thawngtla pawl nasaten an hrem.

Hremawknak a um natsat ruangah thawngtlak pawl cun Silent Strike telin duhphorh dan dangdang hmangin cangvaihnak an nei pehzom tiah sunglam thusuak cu ramsung media pawl ah tarlang a si.

“Thih daan tat nak thu ah thawngtla kil pawl thawn siseh Thawng inn sung ṭuanvonei pawl be lo in silent strike nihnih sung neih a si ih ṭuanvonei pawl in thazaang hmangin Thawngtla pawl an ciil nuai.”

“Tukhalah Thawngtla kil thazaang tampi hmangin an cangvaihdan neihhnai zetin an thlir. Thih daan tat awk nak a um ih inn dang ah an ṭhawt tik khalah mitthli tlak in an zoh liam men. Thih daan tat tuar pawl khal in an tantami innsang le mipi hrang ah zuam pehzom dingin thucahnak neih baak lo cu ti thei mi an nei lo. Zoh liam aw cuahco a si ko” tiah sunglam thu theitu mipakhat cun ramsung media hnen ah sim.

Ram thu thawn pehpar ih Thawngtla dah pawl dinkhawmmi pawlkom hruaitu U Htun Kyi khalin Thawngtla pawl duhphorhnak an nei dan cu hitin a rel.

“Duhphorhnak an nei tikah lutung thei nawn lo dingin thazaang hmangin an hrem ṭheu ruangah cangvaihdan zinkong phunphun an hawl ve.”

“Tukhalah Thawnginn thil zuar mi lei lo nak thawn duhphorhnak an nei. Kuva khal an ei lo. Thawnginn ah thil man khung zetin an zuar ih, cumi kha an nih hrangah sum lut nak ṭhatuk a si. Hremawknak a nasa tuk ruangah tuvekin zinkong phunphun hawlin duhphorhnak an tuah ve” tiah amahcun a ti.

Leave a Reply

Your email address will not be published. Required fields are marked *