NUG cozah in Nehnak co thok

June 21 in July 13 tiang tuah dingmi Voi 47nak United Nations Human Rights Council meeting ah SAC ralhraang an sawm tel ve lo cu NUG hrangah nehnak tumzet co thawn a bangaw.

SAC ralhraang hin Myanmar cozah aiawhtu dinhmun in Leitlun pawlkom tum zetzet le ram picang pawl ih cohlangnak/theihpinak beisei in boruak a hai nasa nan, voi 74nak World Health Organization meeting khalah siseh, Voi 109nak International Labour Organization meeting khalah Myanmar cozah aiawhtu dinhmun in sawmnak an dong lo.

Cumicu leitlun ramtinkim deuhthaw telnak UN, WHO le ILO pawlkom pawl hin rampi aiawhtu cozah dik ah an pom lo ti thawn a bangaw a si.

Myanmar mipi cozah tiih ruahmi NUG khal, cuih meeting pawl ah an sawm tel lo nan SAC ralhraang an sawm lo mi hi kan nih hrang ah nehnak tumzet co thawn a bangaw tiah NUG Union Minister U Aung Myo Min in a rel.

Amahcun “Myanmar aiawh dingin sawmnak kan dong lo nan kan sung tiah kan ruat hrimhrim lo. Atu ah rampi aiawhtu dinhmun in SAC ralhraang an sawm lo mi hi kan nih hrang ahcun nehnak kan co tiah kan sim thei a si”.

“Leitlunhuap ram pawl hin SAC ralhraang ih thilsual tuahmi an thei thluh. Curuangah Myanmar cozah dik ah zo hman in an pom thei lo. Rampi thuneihnak cuhtu, rampi thuneihnak kilkhawi sungtu tiih kan ko khal a si le cozah dik dinhmun in zo hman in an co hlang theilo ti hi a lang fiang zet” a ti.

Leave a Reply

Your email address will not be published. Required fields are marked *