UN Palai U Kyaw Moe Tun that an tum mi thuthup a puut darh

Ralhraang ukhruainak dodal in leitlun mipi hmai ah SAC ralhraang mualphohtu US ram ih um Kawlram UN palai U Kyaw Moe Tun cu tuikaar ah khan pawlkom pakhat in that dingin palai an thlah nan an hlawh tling lo tiah theih a si.

Paisa pek in U Kyaw Moe Tun that dingih an thlahmi palai cu mikhual dinhmun in atufang NewYork ah visa thawn khuasa Myanmar rammi a si ih amah cun U Kyaw Moe Tun pehtlaihnak nei in thuhla hmuahhmuah a sim suak thluh ruangah U Kyaw Moe Tun thihkhat in a luat hi a si.

“August 3 ah thuhla umdan in sim thei ih FBI hnen khalah simtheinak ka nei zo. US cozah lam in zirzoinak an nei bet vivo ding ruangah thuhla cipciar rel a thiang hrih lo” tiah U Kyaw Moe Tun cun reuters hnen ah a sim.

Reuters cun FBI hnen khalah thuhla sutfelnak an nei nan atufang zirzoilai mi thubuai a si ruangah thuthup relsuaktu le U Kyaw Moe Tun thusutfelnak kan nei tibaaklo cu zianghman rel theih a si hrih lo tiah an let.

U Kyaw Moe Tun that dingih tawlreltu pawlkom siseh, paisa ziangzet pekin mithattu ding an hlang timi le ziang ruangah that an tum tivek khal thuhlafelfai a suak hrih lo a si.

Ambassador U Kyaw Moe Tun cu UN meeting ah mipi lam ṭangin SAC ralhraang a maulphoh ruangah ralhraang pawl in hnaṭuan kan ban tiah thu an phuang nan UN lam in Myanmar cozah dik dinhmun in SAC ralhraang a pom theilo ruangah tukum kum cem hlan sung cu amah U Kyaw Moe Tun in Myanmar aiawhtu UN palai ṭuanvo a la hrih ding tiah theih a si.

Leave a Reply

Your email address will not be published. Required fields are marked *