Tuzarh sungih Ralhraang Daantattuar Kawlram mihminthang pawl cazin

Dothlengnak thawn hnuaihnihawtu ti`n SAC ralhraang cun kan ram a buai hnu thla 1-2 hrawngin ramsung mihminthang tamzet a kai.

Langhgan rorin lamzawh nakih teltu siseh, hminthannak hmangṭangkai in online ihsin mipi thapetu kaihkhihtuar mihminthang tamzet an um lakah tuikaar sungih daantattuar mihminthang pawl cu a hnuilam bangtukin an si.

Pyay Ti Oo
Ramsung mihminthang tamzet telin CDM tuah dingih mipi thapetu ti`n February 17 ih SAC ralhraang kaihkhihding cazin suahmi ah a tel ih April 9 ah ralhraang pawl in an kai.

Tuini December 30 ah Insein thawnginn thuṭhenzung in hnaṭuanhar +kum 3 thawngthlak dingin thu a ṭhen sak a si.

Eaindra Kyaw Zin
Anih khal hi a pasal Pyay Ti Oo thawn thubuai an tuah sakmi a bangaw ih tuini December 30 ah hnaṭuanhar +kum 3 thawngthlak ve dingin daantatnak an nei a si.

Saw Phoe Kwar
Anih hi Missionary rak ṭuan dah Karen mi a pu kaihhruainak thawn Christian sungkua ih seilian a si ih hlasakthiam hminthang a si.

Bawlung sit khal a thiam hlei ah rampi aiawhtu football team tiang rak tel bantu a si.

Rampi a buai hnu ah ralhraang in an kai ih caan tawkmawi thawng a tlak hnu ah hnaṭuanhar +kum 3 thawngthlak dingin thu an ṭhen sak ve a si.

Hlasakthiam PO PO
Anih khal hi tuini December 30 ah Insein thawnginn thuṭhenzung in hnaṭuanhar +kum 3 thawngthlak dingin thu a ṭhen sak a si.

Celeb Win Min Than
Ceiawknak/dan thawn pehparin Kawlram internet khawvel ih hminthang a si ih tuini December 30 thotho ah Insein thawnginn thuṭhenzung in hnaṭuanhar +kum 3 thawngthlak dingin thu a ṭhen sak a si.

Lu Min
LuMin telin ramsung milar 6 cu cozah dodal dingin mipi lungtho tertu an si tiah SAC ralhraang in pukmah 505 thubuai orhter in February 17 ah kaih theihnak ca an rak suah.

Kaihkhih phang ah hmun dangdang ah a relh vivo nan February 20 zaanlam ih video a thlah hnu ah rinlopin ralhraang pawl in a relhnak hmun ah an siim ih an kai.

Tuini December 30 ah Insein thawnginn thuṭhenzung in hnaṭuanhar +kum 3 thawngthlak dingin daantatnak a nei a si.

Siarcih : Ralhraang SAC ralkap pawl in Lu Min an kai dan

Ralkap in LuMin an kai nak san

Ye Deight
Riit theih thuthawn pehpar in thawng a tlak lawk ih a suak saal hnu reilote ah Dothlengnak thawn pehpar in ralhraang kaihkhih a tuar saal.

An kai lai ah a taksa par ah riit theih sii an hmu cih thu, ralhraang pawl in an phuang nan tuini December 30 ih daantatnak an nei ahcun midang vekin hnaṭuanhar +kum 3 thawngthlak dingin thu an ṭhen sak.

Model Paing Takhon
Hmelṭhatnak thawn leitlunhuap ih langban ve a si ih, micuangce si cingin ralṭha zetin lamzawhnak ah a tel ruangah ralhraang in kaihkhih theihnak thu an suah ih April 8, zinglam nazi 5 hrawngah Yangon ih a nu inn ah ralhraang pawl in an kai.

TC Candler and The Independent Critics in leitlun hmelmawibik pakhatnak ih an phuan hlan, nikhat duh ah hnaṭuanhar +kum 3 thawngthlak dingin SAC ralhraang in daan a tat a si.

Leave a Reply

Your email address will not be published. Required fields are marked *