Tlawng ca zir dingmi cabu dip 48 Urkaang ziamral

Tanintharyi ramṭhen, Myeik myone hrang Tlawng cazir dingmi cabu dip 48 pawl cu lamlak ah hriamkai pawl in an urkaang ziamral tiah SAC ralhraang thuthang phuang ṭheutu ramsung media ṭhenkhat in an tarlang.

“May 24 zaanlam nazi 6 hrawngah Tlawng cabu phurtu Ke 12 mawṭaw 2 cu Thayetchaung myone, Aukthayetchaung khua kiang ah zo an si ti theih lomi hriamkai pawl in an rak kham.”

“Mawṭaw 2 in cabu dip 1597 an phur ih cumi sung ihsin dep 48 pawl cu lamzin kap ah hriam kai pawl in an khang” ti`n thuthang an suah.

Tlawng ca zir dingmi cabu urkaangtu hi zo pawl an si ti theih fiang a si lo ih, ralhraang lam cun thuhla haisuak tumin hmalaknak an nei vivo tum.

2022-2023 cazirkum hi SAC ralhraang ukhruainak hnuai ah June 2 ihsin Tlawng on an tum ih, May 26 ihsin thok nauhak Tlawngap an cohlang zo ti`n ramsung hrambun media tarlangnak thawngin theih a si.

Atufang hi rampumhuap nu le pa pawl, fa le tlawng ret ding maw ret lo ding timi thu ah lungbuai in thuthluknak tuah an harsat lai fang a si ih, tu san ah fa le Tlawng kai terlo cu dungtolh san man lonak a si titu an um rualin nauhak Tlawng kan kaiter cun CDM rak tuahtu pawl ih pekawknak pawl man nei lo ah a cang thluh titu an um ve thung.

Leave a Reply

Your email address will not be published. Required fields are marked *