Titoihpuai boruak ih Thuthang diklo thlah darh hrim mi pawl

SAC ralhraang tuahmi titoihpuai hluanghlai zet bang dingin ralhraang lamṭang FB cahmai ṭhenkhat in thuthang diklo nasaten an theh darh.

Ralhraang thuthang pholang ṭheutu GFN timi FB cahmai pakhat cun mipi tamzet tipar le tikap ih an pung khawm lai zuk tarlangin “Inle ti par ah mipi tamzetin titoihpuai ropi zetin an hmang” tiah an tarlang.

A share sawngtu an um ih, hnihsuak ah ti`n thlah darh sawngtu khal an um. Atak ahcu an zuk hmang mi cu kum 2019 ih zukmi a si ih tumtah neiin thuthang diklo an thlah hrim mi a si.

“Private hotel pakhat ih tuah mi” ti`n tukum titoihpuai boruak ih puai hman mi bangin video thlah darhtu khal an um.

Cumi khal cu kum 2019 Thingyan Music Festival ih zuk mi video a si ih tukum ih zukmi bangin tumtahnei thuthang diklo an thlah hrim.

Madalay khawlaili Tikap ih minung tamzet an pung khawm mi zuk khal, tukum titiohpuai boruak ta sivekin ralhraang lamṭang media ṭhenkhat in an theh darh.

Asinan, cuih zuk cu tukum ta siloin Mandalay City Development Committee in kum 2018 April 14 ih an thlah mi zuk a si.

SAC ralhraang in kan ram buainak khuhhlo tumin rampumhuap khuapi pawl ah titoihpuai hman nak ding ceimawinak phunphun an tuah nan, a tak ih hmangtu hmuh ding an mal a si.

Leave a Reply

Your email address will not be published. Required fields are marked *