Taunggyi ah Mi 4 an kap that ih Minung 20 lenglo Hliam an tuar

Shan ramṭhen, Taunggyi khualipi ih March 25 lamzawh duhphorhnak ah ralkap le palik kut tuar ih thi mi 4 an um tiah thufelfai a suak.

Taunggyi ahcun March 25, zinglam nazi 4 luan unau hmelpalh hrawng ah zingpit duhphorhnak an nei ih an ṭiak hnu ah palik pawl in Flashbang bomb an puah ih mipi cu an ciil.

Cuitlun ah meithal khal an kap puak ih mipi ṭhenkhat an hliam hlei ah kiangkap ih um motor le bike pawl an siatsuah sak tiah ramsung media ṭhenkhat in an tarlang.

Taunggyi ih um mipakhat cun “Caanhman an ṭheh zo ih miṭhenkhat cu an tlung man. Tlung hrihlo pawl cu a bur in an rak um ih culai fangah palik pawl an thleng. Flashbang bomb an puah hnu ah mino deuh pawl kai dingin an hual ciamco. Neta cun ralkap pawl khal an ra thleng.”

“Palik le ralkap pawl cu veng dangdang ah an vak vivo ih Innkhat hnu innkhat an lut an suak. Ziin kap ih motor thlalang pawl an khuai phah vivo ih bike tivek khal an siatsuah phah vivo.”

“Sun lam khalah veng dangdang ah an lut vivo ih ‘kan lo kap that ding, nan veng pumpihlum in kan ur kang ding’ tiah mi hringhro in an au phah. Ziinkap ih Thingthei zuar pawl phei cu an thilri khal amah pahpah in an tan san ih thinphang in an relh thluh” tiah a ti.

Tuisun, March 25 ih Taunggyi lamzawh duhphorhnak ah a malbik minung 4 an thi tiah Myanmar Now in a ngan ih kaihkhih tuar minung 20 luan an um tiah Eleven media in a tarlang ve. (Hminsin : Mithi le kaihkhih tuar hi tu hnak in an tamsawn khal si thei)

Leave a Reply

Your email address will not be published. Required fields are marked *