Tachileik khawsung bomb puak kahawknak ah mi 2 thi, hriam tuar 30 luan um
Shan ram, Tachileik khawsung ih ralhraang dinpit lamzawhnak an nei lai ah rinlopin bomb a puak ih ralhraang SAC ralkap pawl in thinphang kap in meithal an hmetpuak ruangah ralkap telin hriamtuar 30 luan le mithi 2 an um tiah theih a si.
Mithi 2 cu mipa veve an si ih a hmutu pawl rel dan ah mipi bangih lemcangtu ralkap an si thei vekin hringhro ruangih lamzawhtu mipi an si thei tiah Tachileik News Agency cun a tarlang.
“Mizaansun ihsin lamzawhnak an tuah. Tuini Feb 1 khalah an nei pehzom ih meithal keng sinfen pangai hruktu ralkap bang deuh mitampi an tel. Rinlopin bomb a puak kuai ih thinphang in meithal an kap ciamco ruangah hriamtuar an tam” taih tualsungum mipakhat cun TNA hnen ah sim.
Hriam tuar lakah besia deuh 5 an um ih ralkap le ralkap colhlazo tamzet hriam tuar an um tikhalin amahcun a rel bet hrih.
Rinlopin buainak a suak ruangah ralhraang pawl cu thinhengin khawsung ah an cangvai nasa ih, an hmuh pohpoh vuak thawi kaihkhih an tuam ruangah lengsuakvak an mal tiah theih a si.
Tachileik lamzawhnak ah ralkap cawlhlazo le khawte ih um Lahu, Akha miphun an sawm tam tiah theih a si.
Febuary 1 ih rampumhuap daiziar duhphorhnak phen hlo tumin SAC ralhraang in hmuntin ah thu phunphun suahin a cangvai ih hmun ṭhenkhat ahcun ralkap lamṭang le paisa pek`n miṭhenkhat an cangvaiter.
Tachileik ih bomb puahtu hi zo cangvaihnak a si ti theih a si hrih lo.
