Sagaing : Mihlo hawltu pawl in hremnak hmape khat thluh mi miruak 7 an sar

July 27 ah Sagaing ramṭhen, Kani peng, Zipyindwin khuami pawl in khua dunglam Lomual ah miruak 7 hnakih mal lo an sar.

July 26 zaan ah Zipyindwin khua kiangah SAC ralhraang le PDF an kapaw ih khuami ṭhenkhat le PDF ralkap mihlo an um ruangah, Khuami pawl in cupawl an hawl lai ah miruak 7 an hmu mi a si.

“Ruak 4 cu khur puan te ah an phum ih kan lai suak. A leng ah ruak 3 kan hmu bet ih an zaten ruak 7 an si. A leng ih kan hmumi miruak 1 cu thinkung ah hridai thawn an thlai. Culodang mipahnih cu Lei par ah kan hmu” tiah mihlo hawlnak ih telvetu khuami pakhat in a rel.

Miruak an hmunak hmun cu a bangaw lo nan an taksa par ih hmape pawl cu a bangaw deuh thaw. Nasa zetin hremtuar hnu ih thimi an bang tiah khuami pawl cun an rel.

“Miruak pakhat cu a mit kehvorh rorin a hlo. Midang pawl cu meithal tawkawng thawn vuakvelhnak hriam an pu. An taksa dang khal a pem seksek thluh. Khur sung ih kan phorh mi miruak cu meithal hriam an pu. Mino pakhat cu a kut an ṭawn ih a mitmu khatlam a suak” tiah miruak phorhsuaktu khuami pakhat cun a rel ve.

Khuami pawl cun miruak phumnak khur khat lawng an lai hrih ih lei vawr um dan ah amalbik khur 5 a um belh ding an zum ih cumi an lai suak bet cun miruak pung thei dinhmun.

Kani khuami mipakhat cun “Leilung um dan ah Miruak an phorhnak kiangkap ah khur dang a um bet ding zum a um nan leiphumbomb a um ding zum a um ruangah an lai ngam hrih lo” a ti.

Miruak 7 cu khuami pawl ih hawlmi mihlo pawl an si tiah thuhla theiciangtu mipakhat in Myanmar Now hnen ah a sim ih “July 27 ah an ruak pawl kan vuiliam zo” a ti.

SAC ralhraang pawl in July 9 ah ralkian mipi 15 lai a rualrual rorin an rak that dah ih tuṭum miruak pawl khal hi an mah SAC ralhraang cangvaihnak tiah ruah a si nan ralhraang lam cun thuthannak zianghman an nei hrih lo.

Kan dung zarh lam in Zipyindwin khua kiangah SAC ralhraang le PDF an kap aw ih boruak a sosang vivo ruangah khuate uksuh 5 mipi thawngteel cu ralkain in hramlak ah an beu tiah Myanmar Now in a ngan a si.

***Miruak an phorh lai na zoh duh le a tanglam link hmet aw ….
Ralring : Zoh nuam lo Mithiruak a lang …
Kani peng ih thil thleng

Leave a Reply

Your email address will not be published. Required fields are marked *