Sagaing ah raltlan kum upalam mi 9 an that

Sagaing ramṭhen, Budalin peng, Okpho khua ih raltlan kum upalam mi 9 pawl cu ralhraang ralkap in an kap that tiah theih a si.

Ralhraang SAC ralkap cun hmunram thianfai phuahlam thawn Budalin peng khua ṭhenkhat an luh cilh ih, Okpho khawpawn phungkitlawng ih beutu mawṭaw mawng pakhat le nautenu pakhat telin kum upalam mi 9 pawl cu May 2 ah an kap that ti`n khawmi pawl in an sim.

Miruang pawl cu tuzing May 3 ah hmuhsuah a si ih, mitamsawn cu an Lu pawl ah meithal hriam a um ti`n miruak hmutu mipakhat cun BBC hnen ah a sim.

“An zaten an Lu pawl ah meithal hriam a um. Kum 70mi putar pakhat cu naam thawn an sat bet ih khukbil in a thi.”

“Nupinu pakhat cu ataksa ah vuakvelhnak neh tampi a um. Kum 4mi fanute a tanta. Phungkitlawng ihsin a tlansuak thei khal an um” ti`n khawmi pakhat in BBC hnen ah a sim.

Ralhraang SAC ralkap kut tuar mi 9 pawl cu numi 1 le mipa 8 an si ih, Kum 60 hrawng upa 6, 70 luan upa 2 le Kum 30 hrawng siding zum um mi nautenu 1 tipawl an si.

Ralhraang ralkap pawl cu Budalin khua ihsin khawte lam an pan lai ah PDF bomb puah an tuar ih, an buainak thawn naibiknak Okpho khua an luhcilh tiah theih a si.

Zuk : Budalin peng ih cangvaitu Mipi Ralkap pawl

Leave a Reply

Your email address will not be published. Required fields are marked *