SAC Ralhraang raldo vanzam an kap thlak

Kayah ramkulh, Loikaw ih bomb thlaktu SAC ralhraang vanzam cu tuizaan nazi 8 hrawng ah kapthlak a si thu, Karenni Nationalities Defense Force in thu an suah ih “Dawmukalar khua kiang ah a tlak ih a kaang siat” tiah an tarlang.

Tuini January 8 ah Demawso le Loikaw peng ah SAC ralhraang le hriamkai ṭangrual pawl nasaten an kapaw ih ralbawi telin ralhraag ralkap 30 lenglo an thi hlei ah hriam tuar tamzet an um ti`n KNDF thusuahmi ah an ngan.

Cuihtlunah KNDF in ralhraang raldonak tank pakhat an kap siat thu le meithal 11 telin cerek ṭhenkhat khal an la ngah thu, thu an suah a si.

Doawknak ah SAC ralhraang an tuar nat ruangah sun nazi 2 ihsin zaanlam nazi 7 hrawng tiang raldo vanzam hmangin vanpar ihsin voi 10 lenglo an kap bawm tiah theih a si.

Zaanthim hnu khalah vanzam thawn an kap bet ih nazi 8 hrawngah hriamkai ṭangrual pawl in ralhraang vanzam pakhat an rak kap thlak sakmi a si.

Doawknak ah ralhraang lam tuar na in dung an siip ih khawsung inn pawl an boh phah hlei ah inn 10 lenglo an urkaang tiah KNDF thusuahmi ah an ngan ih “Loikaw doawknak ah PDF (Loikaw) pakhat in nunnak a hlan” tiah an tarlang.

Atuhrawng, Demawso le Loikaw boruak a sosang ruangah vanpar ralthuam hmangin ralhraang an cangvai thei bet ruangah mipi lam ralringten um dingin KNDF in thuthannak an nei cih a si.

Leave a Reply

Your email address will not be published. Required fields are marked *