SAC ralhraang in Psy Ops hmangin mipi thinlung ciah neh tum

Psychological operations (PSYOP) timi cu a ol zawng in kan sim a si le thinlung/ruahnak lam raldonak ti a si ih cu mi cu ralhraang pawl in a lang hngan rorin an hmang thok rero thlang a si.

September thla thok lam ih kaih tuar hriamhma thawi` khatmi mino 2 zuk cu September 18 ah tumtah nei in ralhraang pawl in internet cahmai ah an theh darh.

Mipi le nunnak thaap in ralhraang do ngamtu mino pawl thinlung ah ṭihphannak ciah khat dingih zuk an ti darh hrim mi thuthawn pehpar in rampi boruak thlirtu mipakhat cun mipi thinlung an thleng dang lam thei cuang lo ding a ti.

Amahcun “Atawpkhawk dinhmun kan thleng zo tikah ziangvek thil thleng khalin mipi thinlung a ti dang lam thei nawn lo ding tiah ka ruat.”

“Ziangah cutin kan rel thei ti le rampi a buai thok ihsin kum upa nauhak tilo, ralṭha zetin lamzawh duhphorhnak an nei ngam. Mitamsawn cun ralhraang pawl ih thuanthu mawi lo kan thei thluh cio ih ziangvek dinhmun kan thleng thei timi thei cingin lamzawh duhphorhnak an nei ngam cu kan San dung zawng ih kir saal hnak cun nunnak kan thaap sawn ti thawn a bangaw a si”.

“Cuhleiah mipi humtu hriamkaibu kop in kan mino tamzet cun ralhraang an do rero zo. Cangvaihnak an nei mi kan zoh tikah an lungput a lang thluh.”

“Cun, Ralhraang kut tuar in rapthlak zetih that tuar le ralhraang hremnak/kapnak hriamhma zuk tivek cu online ah nitin kan hmu ringring. Curuangah Psy Ops hmangin mipi thinlung an ciah neh tum cu santlaihnak a nei thei lo ding tiah kan ruat” a ti.

SAC Ralhraang pawl ih theh darh hrimmi zuk sungih mino pahnih cu Kayah ramṭhen, Dimawso peng ih um an si.

Tufang Online ih Lar zet mino pahnih tei` thuhla Dik

Pengkulh sungah kahdonak a suak ruangah khuami dang pawl thawn hramlak ih beu mi an si ih ei-in le thil ṭul neuhneuh lak dingin khua ih an kir lai ah ralhraang pawl ih kaih an tuar tiah theih a si.

Hriamhma thihnai thawn kut zungthum thlir lai mino pahnih zuk cu September thla thok lam ah internet cahmai ah a darh thok ih, mizaan, September 18 ah ralhraang pawl in tumtah nei in a tharin internet cahmai ah an darh ter saal a si.

Leave a Reply

Your email address will not be published. Required fields are marked *