SAC ralhraang in Paisa Lem a tuah ih ramsung ah darhter

SAC ralhraang in Paisa Lem a tuah ih ramsung hmun dangdang ah a darhter tiah thuthang a suak ih, a ra lai ding tikcucaan ah paisa lem a tam sinsin ding zum a um thu, ramlengum Myanmar jornalist MKT in a rel.

Amahcun “tukum, 2022, January thla lai hrawng ihsin thok, Paisa Lem kan zuar titu FB Page 70 lenglo a suak zo. Cumi pawl cu cipciar in cazin a um thluh.”

“Kan dung baite khalah Yangon khawsung pursum tuahnak khawvel ah paisa lem tamzet a herkual ih, thu umdan zoh ciang a si tikah a man a tlaniam sinsin ding zum a um.”

“Nemhnget theih hrih lo mi thuthang ah SAC ralhraang in paisa Lem a suah ih a darhter tiah thuthang a um.”

SAC ralhraang in Paisa Lem a tuah ti hi kan dung 2021 kum lam in rinhlehtu an tam zo. Central bank ihsin Kyat 10000/ ca suahtu mipakhat khalin paisa karlak ah rong malh thei an ret tel tiah a rak rel dah ih, rong malh mi paisa cu online ah a tarlang cih. Cuhleiah ramsung palik in paisa lem le a tuah nak Ceet kan kai tiih thusuah mi hmuh ding a tam zo.

“Tutiangih Paisa Lem a tambiknak cu nisuahnaklam Shan ram, Magway hmun ṭhenkhat, Thailand lole ramri Myawaddy pawl ah hmuh ding a tam ih a ni niin a tam vivo mi kan hmu thei.”

“Ka rel duh san cu atufang kan boruak thawn nitin kyat 5000/10000 ca tham ṭheu pawl hrang kan ral ring thei nak dingah a si. Paisa Lem a tam vivo thei ih kan ralring ṭul” tiah a ti.

Ralring : Kyat 10,000 ca Lem tam tuk a suak

Siarbet : Kyat 10000 ca Lem/Ngai ziangtin kan theithei ding?

1. Kyat 10000 ca tiih a sen in an nemnak kha na kut thawn na zuut ahcun a hrap ding. A naal lo ding.

2. Security hrang ih a lai hri an tuah mi ah “spw” tiih an ngan mi a tung zawngin pakhat, a letlam(dunglam) ah pakhat an ngan mi a um ding.

3. Security hrang ih a lai hri an tuah mi na zoh tikah ahring (green) le sendup pianrong (purple) cokpolh vekin a lang ding.

4. Hri kiang ih kil li neimi ((Square)) kha a tleu nak hmun ah tanglam ihsin na zoh tikah pangpar lem tang ah Kawl ca in 10000 tiih ngan mi na hmu ding.

5. Square kiang ah 10000 tiih a sen in an ngan nak tanglam kha a tleu nak hmun ah na zoh cun CBM tiih thlaam lang fang ih ngan mi na hmu ding.

Paisa Lem hi ziangtik ihsin a suak thok ti cu theih fel a si lo nan kan dung kum lam ah sumdawng pakhat in “bank ih ka suah mi kyat 10000 ca lak ah rong malh thei a tel” ti`n DNA hnen ah a sim a si.

Siarcih : SAC Ralhraang paisa thar suah ve cu a rong a malh thei

SAC Ralhraang pawl ih paisa thar suah ve cu a rong a malh thei

Leave a Reply

Your email address will not be published. Required fields are marked *