SAC ralhraang in Awmanglo tukin Kum kim lo Nauhak pahnih Tazacuai

Mandalay ramṭhen, Sintgaing peng ih doawknak thu thawn pehpar in July 6 ah အုန်းပင်ခြံ khua ih “ရွှေကြယ်စင်” Lakphakdawr cu SAC ralhraang in an luhcilh ih dawr neitu telin mi 7 an kai.

Kaihkhih tuar mi ah dawr neitu fapa (kum 12) le kum 15 mi dawr hnaṭuan bawmtu cu SAC ralhraang in puakkuaitheih thawn pehparmi pukmah 5,6 thawn taza an cuai tiah khuami hnen ihsin theih a si.

July 12 ah voikhatnak zung an suahpi zo ih, an sungkhat naivai mipakhat cun “thuṭhenzung ih hmaisabiknak an suahpi ṭum ah nauhak pahnih cun bawmnak in dil. Kan nih sual nak ziang hman kan nei lo. Sualnak khal kan tuah lo. In bawm hram uh ti`n mit thli tlak phah in bawmnak in dil. Harhdamnak lam ahcun an hrisel ko” a ti.

July 6, zingpit ah SAC ralhraang le mipi humtu PDF pawl cu တံတားဦး vanzam tualrawn kiangah an kap aw ih ralhraang lam ah mipakhat a thi. SAC ralhraang in Sintgaing PDF sungtel pakhat an kai ngah ve ih cumi hnu reilote ah အုန်းပင်ခြံ khua ih “ရွှေကြယ်စင်” lakphak dawr cu SAC ralhraang in an va siim cih mi a si.

Innsung an cawk let hnu ah Lakphak dawr kiangih innte pakhat sungah kuttuah bomb le puakkuaithei thilri kan hmu ti`n ralkap pawl cun an ti ih cumi phuahlam thawn Lakphak dawr neitu telin SAC ralhraang pawl cun mi 7 an kai.

“Nauhak pawl thawn pehparawknak zianghman umlo cingin an kai thotho. An sungten awmanglo zetin kaihkhih an tuar” tiah an kai laifang hmutu veng sung um mipakhat cun a rel ih “atu tla cu dawr neitu damlo besia in ralkap kut ah a thi ti`n thuthang kan thei. Nauhak pahnih cu July 16 ah thuṭhenzung ah an suahpi saal ding” a ti.

Sintgaing PDF sungtel mipakhat khalin bomb le puak kuai thei thilri pawl cu Lakphak dawr neitu thawn pehparawknak an nei lo thu le an mah PDF pawl ta a si sawn thu a rel.

“Vamzam tualrawn ah PDF kan unau pakhat an kai ngah ih a hnen ihsin kan ralthuam retnak hmun an thei. Ziangtheilo nauhak le an sungten kaihkhih an tuar cu kan thin a nuam lo zet” tiah PDF sungtel mipakhat cun Myanmar Now hnen ah a sim.

Puakkuaithei thilri tuah/kol pawl cu ဖောက်ခွဲရေးဆိုင်ရာ ရာဇသတ်ကြီး pukmah 5 thawn thubuai tuahsak ṭheu an si ih mawhnak nei cu kum 14 thawngthlaknak (တစ်ကျွန်းပို့) in siseh, kum 5 thawngthlak bet hlei ah paisa cawh kuan ter in daantatnak an nei ṭheu a si. Pukmah 6 cu cuvek tuahnak thapek pukmah a si ih daantat dan cu pukmah 5 thawn a bangaw sawhsawh.

Leave a Reply

Your email address will not be published. Required fields are marked *